Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 174 Hüküm no: 355 Orijinal metin no: [36a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüma bt. Hasan ile Çalabverdi b. Kutbeddin’in boşandıkları Vech-i tahrîr-i sicil budur ki Hüma bt. Hasan kıbelinden sâbitü’l-vekâle vekîl olup mahrûse-i İstanbul’dan Veli b. Ali şer‘- i şerîf meclisine Soğanlık nâm karyeden Çalabverdi b. Kutbeddin mahzarında ikrâr eyleyip dedi ki, vekîl-i olduğum mezbûre Hüma mezbûr Çalabverdi’nin zevcesi iken talâk verip ve bâinen ıtlâk eylemiş imiş. Hâliyâ bin akçe mehr-i mü’eccelden ve yüz akçe nafaka-i ıddetinden ve iki döşek ve bir yorgan üç yastık ve iki çârşeb ve bir tencere ve bir maşa ve bir sacayağı ve bir minder bu zikr olunan mezbûr Çalabverdi alıkoyup vermemiş taleb ederim, dedikde muslihûn mâbeynlerin ıslâh eyleyip zikr olunan esbâbı alâ-haddihî ıddet nafakası için yüz akçe bi’l-vekâle vekîl olduğum mezbûr Hüma için alıp kabz eyledim ve bin akçe mehr-i mü’eccel da‘vâsından zimmetini ibrâ eyledim ba‘dehû da‘vâmız olmaya, dedikde mezbûr Çalabverdi vicâhen ve şifâhen tasdîk eyleyip bi’t-taleb tescîl olundu. Tahrîren fî evâili Safer sene 957. Şuhûdü’l-hâl: Hasan b. Abdullah, Hoca Ali b. Sadeddin el-hayyât bin İstanbulî ve Ahmed b. Abdullah el-kazzaz ve Sinan Bey b. Abdullah ve Timur Bey b. Abdullah er-râcil, Mustafa b. Abdullah er-râcil ve İmâm Abdi b. Mustafa ve Yakub b. Ahmed ve Hızır b. Ahmed ve Mahmud b. Ahmed ve gayruhüm.