Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 497 Hüküm no: 559 Orijinal metin no: [81b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul ve tevabii elekçi ve değirmencileri kethüdası olup başka diyara giden Mahmud b. Ali’nin yerine tayin edilen Hacı Mehmed b. Nasıruddin’in kethüdalığının onaylandığı Mahmiye-i İstanbul’da ve tevâbi‘inde vâki‘ harc ve hâssa elekciyân ve değirmenciyân esnâfı kethüdâsı olan işbu râfi‘u’l-kitâb el-Hâc Mehmed b. Nasıruddin nâm kimesne meclis-i şer‘-i şerîf-i enverde takrîr-i kelâm ve tâʻbir ani’l-merâm edip bundan akdem esnâf-ı mezkûre üzerlerine bâ-berât-ı şerîf-i âlî-şân kethüdâ olan Mahmud b. Ali nâm kimesne âhar diyâra gidip ismi mevcûd ve cismi nâ-mevcûd olduğundan nizâmları bozulup muhtell ü müşevveş ve her vechile ihtilâle bâ‘is olmuşdur deyü esnâf-ı mezbûre fukarâsı ahvâllerin der-i devlet-medâra arzuhâl eylediklerinde ahvâlleri şer‘le görülüp [82a] i‘lâm oluna deyü yedlerine fermân-ı şerîf-i âlî-şân i‘tâ olunmağın hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri bî-garaz Müslimînden Yusuf b. Ali ve el-Hâc Kasım b. Mehmed ve es-Seyyid Mehmed b. Ramazan ve Derviş Hicâzî b. Mehmed ve el-Hâc Osman b. el-Hâc Nasuh ve Hüseyin b. Mehmed nâm kimesnelerden mezbûr Mahmud’un gaybet-i münkatı‘a ile gāib olup ve benim dahi cümlenin muhtârı olduğumu i‘lâm etmekle yedime işbu berât-ı âlî-şân verilmeğin nazar olunup kıbel-i şer‘den dahi istihkâmen hüccet-i şer‘iyye verilmek matlûbumdur dedikde ba‘de’n-nazar hâl bâlâda takrîr eylediği vech üzere olduğu zâhir ve nümâyân olmağın mûcebince kıbel-i şer‘den li-ecli’l-istihkâm işbu vesîka bi’t-taleb ketb olunup yed-i tâlibe def‘ ve i‘tâ olundu. Fî 9 min-Şa‘bâni’l-mu‘azzam sene 1121 Şuhûdü’l-hâl: Mustafa Çelebi b. Şa‘ban, Ali Çelebi b. Bâli, Hasan b. Mustafa, Ali Çelebi b. İvaz, Süleyman b. Abdullah ve gayruhum mine’l-huzzâr.