Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 252 Hüküm no: 603 Orijinal metin no: [59b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çoban Pavli b. Nikola’nın Mustafa Bey b. Abdullah’a ait koyunları ve koçu çaldığı Vech-i tahrîr-i hurûf [oldurki] Mustafa Bey b. Abdullah meclis-i şer‘a Pavli b. Nikola nâm çobanı ihzâr edip takrîr-i da‘vâ kılıp ben sefer-i hümâyûnda iken ba‘zı koyunum sirkat olunup zannım senden gelir deyip mezbûr Pavli’den su’âl olundukda inkâr ile cevâb vericek mezbûr Mustafa Bey dedi ki seferde iken sen benim büyük koçu sirkat edip sana yazık? değil midir demişler sen demişsin ki koyun arasında ol rast geldi deyû ikrâr etmişsin deyicek mezbûr Pavli inkâr edip mezbûr Mustafa Bey’den beyyine taleb olunup Mustafa b. Süleyman ve Mehmed b. Himmet biz yalıda idik, ol koça nice kıydın dedik, mezbûr Pavli “nice idelüm tavşan çomağa rast geldi” deyû ikrâr edip ba‘de’t-tezkiyye şâhidân-ı mezbûrânın şehâdetleri hayyiz-i kabûlde vâki‘ olup mâ-hüve’l-vâki‘ bi’t-taleb kayd-ı sicil olundu. Vaka‘a’t-tahrîr fî evâili Muharremi’l-harâm sene 958. Şuhûdü’l-hâl: Mehmed Bey b. Abdullah Silâhî, Ali b. Sefer Çelebi, Ali b. Mehmed, Hüseyin b. İsâ, Mustafa b. Mehmed, Ramazan b. Hüseyin ve gayruhüm