Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 499 Hüküm no: 561 Orijinal metin no: [82a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mehmed’in Makrihorya köyündeki bahçesini kocası İmam İsmail Efendi b. Salih’e satıp zimmetini ibra ettiği Husûs-ı âti’z-zikrin mahallinde ketb ü tahrîr ve taksîmi için fermân-ı âlî vârid olmağın imtisâlen-leh cânib-i şer‘-i mergūbdan Mevlânâ Mehmed Efendi b. Yusuf irsâl olunup ol dahi hâssa mi‘mâr halîfelerinden Hasan Halîfe b. Mahmud ile Havâss-ı Refî‘a kazâsına tâbi‘ Makrihorya nâm karyede vâki‘ hâlâ karye-i mezbûre imâmı olan İsmail Efendi b. Salih nâm kimesnenin sâkin olduğu menzile varıp zeyl-i kitâbda mastûrü’l-esâmî Müslimîn huzûrunda akd-i meclis-i şer‘-i şerîf eyledikde merkūm İsmail Efendi’nin zevce-i menkûhası Fâtıma bt. Mehmed nâm hatun zâtı ba‘de’t-ta‘rîfi’ş-şer‘î meclis-i ma‘kūd-ı mezkûrda işbu bâ‘isü’l-kitâb zevci mezbûr İsmail Efendi mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup bir tarafdan Atike Hatun menzili ve bir tarafdan Rukiye Hatun menzili ve bir tarafdan zevcim mezbûr İsmail Efendi menzili ve bir tarafdan tarîk-i âm ile mahdûd tûlen ve arzen bi-hesâb-ı terbî‘î üç yüz on beş zirâ‘ arsa ve eşcârı muhtevî mülk bahçemi baʻde’l-ifrâz merkūm İsmail Efendi’ye on guruşa tarafeynden bi’l-îcâb ve’l-kabûl bey‘-i bâtt-ı sahîh-i şer‘î ile bey‘ <> ve teslîm ve temlîk ol dahi ber-vech-i muharrer iştirâ ve tesellüm ve temellük ve kabz ve kabûl eylediğinden sonra semeni olan meblağ-ı mezbûr on guruş da‘vâsından mezbûr İsmail Efendi’nin zimmetini ibrâ-i âmm-ı kātı‘u’n-nizâ‘la ibrâ ve iskāt eyledim fîmâ-ba‘d sâlifü’z-zikr bahçe mezbûr İsmail Efendi’nin mülk-i müşterâsıdır benim kat‘â alâka ve medhalim yokdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s <> el-Hâc Hasan b. Abdurrahman ve Muhzır Abdullah b. Abdullah ile cânib-i şer‘-i şerîfe gelip her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 4 min-Şa‘bâni’l-mu‘azzam sene 1121 Şuhûdü’l-hâl: Usta Hacı Mustafa Ağa b. Mehmed, Mehmed Ağa b. Hasan, Ahmed Ağa b. Ramazan, Süleyman Ağa b. Osman, Ebûbekir Ağa b. Mustafa, Müezzin Osman Halîfe b. Ali, Ali Çelebi b. Osman, İbrahim b. Ahmed, İbrahim b. İsmail, Mustafa Çelebi b. Şa‘ban, Ali Beşe b. Bâli, İbrahim b. Bâli ve gayruhum mine’l-huzzâr.