Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 499 Hüküm no: 562 Orijinal metin no: [82a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mehmed ile kocası Makrihorya köyü imamı İsmail Efendi b. Salih’in meskun oldukları evdeki hisselerinin ifrazı Kezâlik akd-i meclis-i şer‘-i şerîf eyledikde merkūm İsmail Efendi’nin zevce-i menkûhası Fâtıma bt. Mehmed nâm hatun zâtı ba‘de’t-ta‘rîfi’ş-şer‘î meclis-i ma‘kūd-ı mezkûrda işbu bâ‘isü’l-kitâb zevci mezbûr İsmail Efendi mahzarında takrîr-i kelâm edip karye-i mezbûrede vâki‘ bir tarafdan baʻzan ekmekçi fırını ve baʻzan Hasan Bey menzili ve bir tarafdan Mehmed Bey menzili ve bir tarafdan baʻzan Rukiye Hatun menzili ve baʻzan benim âhar mülk bahçem ve bir tarafdan tarîk-i âm ile mahdûd fevkānî üç bâb oda ve bir kenîf ve tahtânî bir bâb oda ve bir mağsel ve zât-ı eşcâr-ı müsmire ve gayr-ı müsmire bahçeyi müştemil işbu mülk menzil zevcim mezbûr İsmail Efendi ile beynimizde nısfiyyet üzere müşterek olup kābil-i kısmet olmağla keşf ve müşâhede ve mesâha ve beynimizde bi’t-terâzî taksîm ve her birimiz hisseleri ifrâz ve ta‘yîn olunmak murâdımızdır dedikde baʻde’l-keşf ve’l-mu‘âyene hâl minvâl-i muharrer üzere olduğu tahakkukundan sonra mi‘mâr-ı mezbûr menzil-i mezbûrun ebniye ve arsasını mesâha eyledikde tûlen ve arzen bi-hesâb-ı terbî‘î yüz elli üç zirâ‘ olup mezbûr Hasan Bey ve ekmekçi fırını tarafından tûlen ve arzen bi-hesâb-ı mezbûr yetmiş altı buçuk zirâ‘ arsa üzerinde vâki‘ bir bâb kebîr oda ve bir yan sofası ve dehlîz ve bir bâb tahtânî oda ve bir mağsel ve tûlen ve arzen bi-hesâb-ı mezbûr iki yüz elli iki zirâ‘ bahçe arsası mezbûre Fâtıma’nın hissesîçün ifrâz ve ta‘yîn olunup ve mezbûre Rukiye Hatun menzili ile mezbûre Fâtıma’nın bahçesi tarafından iki bâb [82b] fevkānî oda ve dehlîz ve bir kenîf ve tûlen ve arzen bi-hesâb-ı mezbûr üç yüz yetmiş sekiz zirâ‘ bahçe arsası mezbûr İsmail Efendi’nin hissesîçün ifrâz ve ta‘yîn olunup ve beynlerinde olan duvarı iştirâken binâ etmek üzere her biri ber-vech-i muharrer hisse-i mu‘ayyene-i müfrezelerini kabz ve kabûl edip mezbûre Fâtıma Hatun zikri mürûr eden bahçe hissesinden mezbûr İsmail Efendi’nin hissesinde olan bi-hesâb-ı terbî‘î altmış üç zirâ‘ ziyâde arsa hissesine ve bi’l-cümle husûs-ı mezbûra müte‘allika âmme-i de‘âvî ve mutâlebâtdan zevci mezbûr İsmail Efendi’nin zimmetini ibrâ ve iskāt edip ve mezbûr İsmail Efendi dahi kezâlik husûs-ı mezbûra müte‘allika cemî‘ de‘âvî ve mutâlebâtdan mezbûre Fâtıma Hatun’un zimmetini ibrâ-i âmm-ı kātı‘u’n-nizâ‘la ibrâ ve iskāt eylediklerinden sonra vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan el-Hâc Hasan b. Abdurrahman ve Muhzır Abdullah b. Abdullah ile cânib-i şer‘-i şerîfe gelip her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 4 min-Şa‘bâni’l-mu‘azzam sene 1121 Şuhûdü’l-hâl: Es-sâbikūn, es-sâbikūn, es-sâbikūn.