Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 265 Hüküm no: 642 Orijinal metin no: [63b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Merdivenköy âmili Ali b. Şaban’ın, ölen Balaban’ın yerini Durmuş b. Abdullah’a tapuladığı Vech-i tahrîr-i hurûf oldur ki Karye-i Nerdübanlı’ya âmil olan Ali b. Şaban meclis-i şer‘a ikrâr ve i‘tirâf edip dedi ki karye-i mezbûrdan Balaban fevt olup yeri mahlûl olmağın yer tapuya müstahik olmağın hudûd bir taraf çiftlik yere ve bir taraf tarîk-ı âmma ve bir taraf İbrahim yerine ve bir taraf İskender yerine muttasıldır işbu sâhibü’s-sicil Durmuş b. Abdullah yüz akçe resm-i tapusun aldım vakıf için kabz ettim nice dilerse mutasarrıf ola kimesne mâni‘ olmaya, dedikde mezbûr Durmuş vicâhen tasdîk ettikden sonra kıymet-i tapu mukarrer olup bi’t-taleb kayd-ı sicil olundu. Vaka‘a’t-tahrîr fî evâhiri Rebi‘ilevvel sene 958. Şuhûdü’l-hâl: İbrahim b. Hızır, Hacı Musa b. Hüseyin, Hasan b. Durmuş, Ahmed Çelebi b. Mustafa, Mehmed b. Ali, Mehmed Bey b. Abdullah Silâhî ve gayruhüm