.:: İstanbul Kadı Sicilleri ::.


Üsküdar Mahkemesi 17 Numaralı Sicil (H.956-963/ M.1549-1556)
cilt: 6, sayfa: 286
Hüküm no: 712
Orijinal metin no: [70b-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Todora bt. Yani’nin Bendelyos b. Yani’nin evine taş atıp küfrettiği

Vech-i tahrîr-i hurûf oldur ki Karye-i Çengel’den Bendelyos b. Yani meclis-i şer‘a Todora bt. Yani[’yi] ihzâr edip üzerine takrîr-i da‘vâ kılıp sen benim evim üzerine gelip taş atıp bana “bre gidi” deyû şetm ettin dedikde mezbûr Todora’dan istintâk olundukda inkâr ile cevâb vericek mezbûr Bendelyos’dan sıdk-ı makāline muvâfık beyyine taleb olunup hâliyâ karye-i mezbûra nöbetçi olan Hasan b. Abdullah nâm yeniçeri ve İstemad b. Nikola ve Nikola b. Yani ve Yani b. Kapsel nâm kimesneler dediler ki biz şâhidleriz ve şehâdet ederiz mezbûr Todora mezkûr Bendelyos’un evine taş atıp “bre gidi” dedi deyû şetm etti, deyû şehâdet-i şer‘iyye ettiklerinde ba‘de’t-tezkiyye hayyiz-i kabûlde vâki‘ olup mâ-hüve’l-vâki‘ bi’t-taleb kayd-ı sicil olundu. Vaka‘a’t-tahrîr fî evâsıtı Recebi’l-mürecceb sene 958.


Şuhûdü’l-hâl: Mustafa b. Mehmed, Kara Yusuf b. Abdullah, Papa Yani b. Nikola, Kosta b. Marko, Yani b. Nikola, Nikola b. Divali, Kosta b. Koçi, Toma b. Karaoğlan ve gayruhüm