Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 306 Hüküm no: 768 Orijinal metin no: [80a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer Bey b. Abdullah’ın ölen Üveys Çelebi b. Mehmed’de alacağı olduğu Vech-i tahrîr-i sicil budur ki Mahrûse-i İstanbul’dan yasak kulu olan Cafer Bey b. Abdullah meclis-i şer‘a gelip takrîr-i kelâm kılıp dedi ki müteveffâ Üveys Çelebi b. Mehmed nâm kâtib hâl-i hayâtında karz-ı hasen iki bin akçe medyûn fevt olup zimmetinde kaldı, dedikde müteveffâ Üveys’in yetîmlerine vasıyy-i muhtâr olan fahru’l-emâsil ve’l-akrân Hasan Bey b. Abdullah’dan su’âl olundukda inkâr ile cevâb vericek mezbûr Cafer Bey’den beyyine taleb olunup udûl-i müslimînden el-Hâc Mustafa b. Hamza ve Ali b. İbrahim nâm kimesne biz şâhidleriz ve şehâdet ederiz Cafer Bey müteveffâ Üveys Çelebi’ye karz iki bin akçe verip fevt olup zimmetinde kaldı, dediklerinde ba‘de’t-tezkiyye şâhidân-ı mezbûrânların şehâdetleri hayyiz-i kabûlde vâki‘ olup meblağ-ı merkūm merhûm Üveys Çelebi’nin muhallefâtından hükm olunup bi’t-taleb kayd-ı sicil olundu. Vaka‘a’t-tahrîr fî evâili Rebi‘ilevvel sene 958. Şuhûdü’l-hâl: Ferruh Kethüdâ b. Abdullah, Şeyh Mehmed b. Nefis, İlyas b. Kara Hüseyin, Sofi Yusuf b. Hamza, İlyas Bâli b. Hacı Hasan, Mustafa b. Mehmed ve gayruhüm