Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 306 Hüküm no: 769 Orijinal metin no: [80a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Üveys Çelebi b. Mehmed’in topladığı haraçtan zimmetindeki vergi terekesinden ödendiği Vech-i tahrîr-i sicil budur ki Müteveffâ Üveys Çelebi b. Mehmed’in harâcdan bâkī zimmetinde mâl-ı mîrîden dokuz bin dört yüz elli dört akçe vardır deyû ebnâ-yı sipâhiyândan Mehmed b. Yahya yedinden tezkire-i şerîf vârid olup mazmûnu gevher-nisârında münderic olan oldur ki, müteveffâ Üveys b. Mehmed zimmetinde harâcdan yani zimmetinde dokuz bin dört yüz elli dört akçe bâkī kalmışdır, esbâbından ve emlâkinden sattırıp hızâne-i âmireye irsâl edesiz deyû fermân olunmağın imtisâlen li-emri’l-âli mezkûr gulâm-ı sultânî Mehmed ile müteveffâ-yı mezbûr Üveys’in yetîmlerine vasıyy-i muhtâr olan fahru’l-emâsil ve’l-akrân Hasan Bey b. Abdullah ile meclis-i şer‘a hâzırân olduklarında merhûm Üveys’in muhallefâtından meblağ-ı merkūm hükm olundukda bende meblağ-ı merkūmu tahsîl edip meclis-i şer‘de gulâm-ı mezbûr Mehmed’e hâzine-i âmireye irsâl için teslîm olunup mâ-hüve’l-vâki‘ bi’t-taleb kayd-ı sicil olundu. Vaka‘a’t-tahrîr fî evâili Rebi‘ilevvel sene 958. Şuhûdü’l-hâl: Ali Bekir b. Abdullah, Baba Fakīh b. Murad, Burak Çelebi b. Davud, El-Hâc Ahmed b. Hasan, Durbâli b. Gaybi, Hacı Süleyman b. Mehmed, Hacı Hızır b. Mehmed, Sofi Yusuf b. Hamza, Mustafa b. Mehmed ve gayruhüm