Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 510 Hüküm no: 576 Orijinal metin no: [84a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Efendi b. Receb’in tasarrufunda olup arsası Safiye Hatun vakfından olan mülk menzilini Hacı Mehmed Çelebi b. Şeyh Hasan Efendi’ye sattığı Mahmiye-i İstanbul’da Zincirliservili Koca Mustafa Paşa Mahallesiʼnde sâkin Hasan Efendi b. Receb nâm kimesne meclis-i şer‘-i hatîr-i lâzımü’t-tevkīrde işbu râfi‘u’l-kitâb el-Hâc Mehmed Çelebi b. eş-Şeyh Hüseyin Efendi mahzarında ikrâr ve takrîr-i kelâm edip merhûme Safiye Hatun’un süknâsı her yevm üçer kere rûhiʼçün İhlâs-ı şerîf tilâvet etmek üzere bir recül-i sâliha meşrûta vakfı olup mahalle-i mezbûrede vâki‘ bir tarafdan Mustafa Ağa b. Şa‘ban mülkü ve bir tarafdan Hadice Hatun mülkü ve bir tarafdan Koca Mustafa Paşa Zâviyesi’ne meşrûta menzil ve bir tarafdan tarîk-i âm ile mahdûd büyût-ı adîdeyi müştemil menzil tevcîh-i hâkimü’ş-şer‘le tasarrufumda olmağla yedimde olan keşif hücceti nâtıka olduğu üzere menzil-i mezkûrda müceddeden izn-i hâkimü’ş-şer‘le ihdâs eylediğim ebniye-i memlûke-i ma‘lûmemi kızım oğlu mezbûr el-Hâc Mehmed Çelebi’ye tarafeynden îcâb ve kabûlü hâvî [84b] bey‘-i bâtt-ı sahîh-i şer‘î ile yüz elli guruşa bey‘ ve teslîm edip ol dahi ber-vech-i muharrer iştirâ ve tesellüm ettiğinden sonra semeni olan meblağ-ı mezbûru bi’t-tamam ahz u kabz eyledim dedikde gıbbe’t-tasdîkı’l-mer‘î mezbûr Hasan Efendi menzil-i mezkûrun atîk binâ ve arsasından dahi kasr-ı yed etmekle hâkim-i muvakki‘-ı sadr-ı kitâb hazretleri dahi arsa ve ebniye-i atîkayı şart-ı vâkıfe-i mezbûre üzere merkūm el-Hâc Mehmed Çelebi’ye tevcîh buyurmağın mâ-vaka‘a bi’t-taleb ketb olundu. Fî-evâili Recebi’l-mürecceb sene 1121 Şuhûdü’l-hâl: el-Hâc Mustafa Efendi b. Mehmed, eş-Şeyh Hüseyin Efendi b. İlyas, el-Hâc Hüseyin Çelebi b. Abdullah, Mehmed Efendi b. Receb, el-Hâc Mehmed b. Şa‘ban, el-Hâc Mustafa b. Şa‘ban ve gayruhum mine’l-huzzâr.