Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 509 Hüküm no: 575 Orijinal metin no: [84a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Yusuf’un boşandığı kocası Hacı Resul b. Osman’a olan borcunu ödemesi Mahmiye-i İstanbul’da Sultan Mehmed Câmi‘-i şerîfi kurbünde Hasan Halîfe Mahallesiʼnde sâkin işbu sâhibü’l-kitâb el-Hâc Resul b. Osman nâm kimesne meclis-i şer‘-i şerîf-i enverde zevce-i sâbıkāsı olup zâtı ta‘rîf-i şer‘î ile mu‘arrefe olan Fâtıma bt. Yusuf nâm hatun mahzarında üzerine da‘vâ ve takrîr-i kelâm edip mezbûre Fâtıma’ya bundan akdem zevciyyet beynimizde kāim iken kendi mâlımdan kırk guruşumu ikrâz ve teslîm ol dahi iktirâz ve tesellüm ve kendi mesârifine sarfla istihlâk edip meblağ-ı mezbûrdan on guruşunu yine bana def‘ ü teslîm ben dahi yedinden ahz u kabz edip bâkī zimmetinde otuz guruş hakkım kalmağın taleb eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûre Fâtıma cevâbında fi’l-vâki‘ kaziyye minvâl-i muharrer üzere olup lâkin mezbûr el-Hâc Resul ile bundan esbak muhâla‘a olduğumuzda meblağ-ı bâkī-i mezbûr otuz guruş mutâlebesinden zimmetimi ibrâ ve iskāt eylemişidi deyü def‘le mukābele edicek gıbbe’l-istintak ve akībe’l-inkâr mezbûre Fâtıma’dan def‘-i mezbûrunu mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ mezbûre Fâtıma ile muhâla‘a olduklarında meblağ-ı bâkī-i mezbûr otuz guruş mutâlebesinden mezbûre Fâtıma’nın zimmetini ibrâ ve iskāt eylemediğine mezbûr el-Hâc Resul’e yemîn teklîf olundukda ol dahi hasbe’l-mesûl yemîn biʼllâhi’l-aliyyi’l-a‘lâ etmeğin mûcebince meblağ-ı mezbûr-ı bâkī otuz guruşu müdde‘î-i mezbûr el-Hâc Resul’e edâ ve teslîme mezbûre Fâtıma’ya tenbîh olunup mâ-vaka‘a bi’t-taleb ketb olundu. Fî 10 min-Şa‘bâni’l-mu‘azzam sene 1121 Şuhûdü’l-hâl: Mehmed Ağa b. Abdullah Kethüdâ-yı muhzırân, Mustafa Çelebi b. Şa‘ban, Ali b. İvaz, İbrahim Kādızâde, Hasan b. Mustafa ve gayruhum mine’l-huzzâr.