Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 512 Hüküm no: 578 Orijinal metin no: [84b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Salıcı Kostantin v. Avramiki’nin vârislerinden kız kardeşi Dökine’nin terekedeki hissesini diğer vâris Dimitri v. Dimo’dan sulh yoluyla alıp zimmetini ibra ettiği Mahrûse-i Selanik mahallâtından İkişerefeli Mahallesi’nden olup mahmiye-i İstanbul’da Bahçekapısı dâhilinde Meydancık nâm mahalde sâkin iken bundan akdem hâlik olan Derzi Salıcı Kostantin v. Avramiki v. İstemat nâm zimmînin yedinde olan hüccet-i şer‘iyye nâtıka olduğu üzere li-ebeveyn kız karındaşı ve hasran vârisi olan Dökine nâm Nasrâniye meclis-i şer‘-i şerîf-i enverde hâlik-i mezbûrun mukırrun-leh bi’n-neseb cihetinden vârisi olmak zu‘muyla terekesine vâzı‘u’l-yed olan işbu râfi‘u’s-sifr Dimitri v. Dimo nâm zimmî muvâcehesinde bi’l-verâse ikrâr ve takrîr-i kelâm edip mezbûr Dimitri karındaşım hâlik-i mezbûrun vârisi olmak üzere hîn-i helâkinde yanında mevcûde olan terekesini ve zimem-i nâsda olan hukūkunu ahz u kabz etmişidin deyü mezbûr Dimitri’den bundan akdem taleb ve da‘vâ eylediğimde beynimizde nizâ‘-ı küllî vukū‘undan sonra beynimize muslihûn tavassut edip mezbûr Dimitri da‘vâ-yı mezkûremden benimle yedi yüz guruş üzerine sulh olduğunda ben dahi vech-i meşrûh üzere sulh-ı mezbûru kabûl ve bedel-i sulh-ı mezbûr olan meblağ-ı mezbûr yedi yüz guruşu mezbûr Dimitri bana def‘ ü teslîm ben dahi yedinden tamamen ahz u kabz eylediğimden sonra fîmâ-ba‘d karındaşım hâlik-i mezbûrun kalîl ü kesîr terekesine ve sâir zimem-i nâsdan makbûzuna ve hâlik-i mezbûrun vücûh-ı birre vasiyet eylediği sülüse müte‘allika mezbûr Dimitri ile vechen mine’l-vücûh da‘vâ ve nizâ‘ım kalmayıp husûs-ı mezbûra müte‘allika âmme-i da‘vâdan mezbûr Dimitri’nin zimmetini ibrâ-i âmm-ı râfi‘u’l-hısâm ile ibrâ ve iskāt eyledim dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 11 min-Şa‘bâni’l-mu‘azzam sene 1121 Şuhûdü’l-hâl: İbrahim Ağa b. Ali, Salih b. Abdullah, Yusuf b. Hasan Mübâşir, Hasan Beşe b. Mustafa, Ali b. İvaz ve gayruhum mine’l-huzzâr. Nikola v. Dimo, Dimitri v. Yani, Rado v. İstano, Petro v. Ratoni, Praşkova v. Avyori, Sefer v. Kirkor, Manol v. Zafiri, Yorgi v. Todori, Dimitri v. Papa Hristo.