Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 122 Hüküm no: 130 Orijinal metin no: [10b-10] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Davud Paşa İmareti Hamamı’nın Mehmed b. Mustafa’ya mukataaya verildiği Vech-i tahrîr-i sicil oldur ki Mahmiye-i Üsküdar’da merhûm ve magfûrun leh Davud Paşa hazretlerinin câmi‘-i şerîfi ve imâret-i latîfi evkāfına hâlâ mütevellî olan Hacı Hamza b. Mustafa’nın kāimmakāmı olan Mevlânâ Şeyh Muhyiddin b. Nefes meclis-i şer‘de mahrûse-i İstanbul’dan Kasımpaşa mahallesinden Mehmed b. Mustafa mahzarında bi-tav‘ihî ikrâr-ı sahîh-i şer‘î ve i‘tirâf-ı sarîh-i mer‘î kılıp dedi ki, evkāf-ı mezbûreden mahrûse-i mezbûreden Dere Kemal Câmii mahallesinde vâkı‘ olan hamâmı işbu sene ihdâ ve seb‘îne ve tis‘a-mi’e Muharremi’nin gurresinden yıl tamâmına peşin (…) (…) filori verip mâh be-mâh kısta’l-yevmini vermek üzerine mezbûr Mehmed’e altı bin akçeye verdim şimden geri tasarruf etsin dedikde, mezbûr Mehmed dahi vicâhen vech-i meşrûh üzerine kabûl ettim deyip zarar-ı mâla mahrûse-i mezbûrede Fîruz Ağa mahallesinden Şengül hamâmcısı olan İbrahim b. Halil kefîl olup mâ hüve’l-vâkı‘ ber sebîl-i temessük ketb olunup yed-i tâlibe vaz‘ ve def‘ olundu ki lede’l-hâce müzekkirü’l-hâl ve musaddikü’l-makāl ola. Tahrîren fî gurre-i Muharremi’l-harâm sene ihdâ ve seb‘îne ve tis‘a-mi’e. Şuhûdü’l-hâl: Mevlânâ Alaaddin Efendi b. İbrahim ve Alagöz Bey b. Abdullah ve Kasım Halîfe b. Ahmed ve Mustafa Çelebi b. Ali ve Sefer b. İlyas ve Ramazan b. Hüseyin ve Mustafa b. Mehmed ve gayruhum