Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 125 Hüküm no: 140 Orijinal metin no: [11b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mevlana Şeyh Mehmed Çelebi Efendi b. Mustafa’nın, Şeyh Mehmed b. Ahmed ve Mustafa b. Mahmud’a borçlu olduğu Vech-i tahrîr sicil budur Hâlâ Mahmiye-i Ba‘albek Efendisi olan eşrefü’l-ulemâi’l-mütebahhirîn Mevlânâ Şeyh Mehmed Çelebi Efendi b. Mustafa meclis-i şer‘-i şerîfde Mahmiye-i Malatya’dan Şeyh Mehmed b. Ahmed ve Mustafa b. Mahmud nâm kimesneler mahzarlarından bi-tav‘ihî ikrâr-ı sahîh-i şer‘î ve i‘tirâf-ı sarîh-i mer‘î kılıp dediler ki mezbûrân Şeyh Mehmed’e ve Mustafa’ya sâbıkā mushaf-ı şerîf ve kul ve at bahâsından zimmetimde bin iki yüz sikke filori deynim olup hâliyâ mahrûse-i İstanbul Efendisi Mevlânâ Perviz Efendi mahkemesinde hüccet-i şer‘iyye dahi olunmuş idi hâliyâ at ve katır bahâsından ve karz-ı hasenden mezbûrâna üç yüz yirmi sikke lâzımü’l-edâ deynim olup cem‘an mezbûrâna bin beş yüz yirmi tâmmü’l-vezn sahîhü’l-ayâr sikke filori lâzımü’l-edâ deynim olup meblag-ı merkūmun dokuz yüz sikkesin mezbûr Şeyh Mehmed’in olup ve altı yüz yirmisi mezbûr Mustafa’nın olup sene seb‘îne ve tis‘a-mi’e Zilhiccesi’nin onuncu gününde altmış güne mü’ecceldir dediklerinde mukırr-ı müşârunileyhin i‘tirâfını vicâhen ve şifâhen mezbûrân Şeyh Mehmed ve Mustafa dahi tasdîk ve tahkīk edip sıhhat-ı ikrâra hükm olunup mâ hüve’l-vâkı‘ ber sebîl-i temessük ketb olunup yed-i tâlibine vaz‘ ve def‘ olundu ki lede’l-hâce ihticâc edine. Tahrîren fî evâili şehri Muharremi’l-harâm sene ihdâ ve seb‘îne ve tis‘a-mi’e. Şuhûdü’l-hâl: Seydî Gâzî b. Zeynel Abidin ve Mustafa b. Himmet ve Karaca b. Hacı ve Osman b. Mehmed ve Ali b. Elhâc Mehmed ve Abdülaziz b. Ali ve Mehmed Çelebi b. Ömer ve Mustafa b. Mehmed ve Kâtibü’l-hurûf Mustafa b. Mehmed ve gayruhum