Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 126 Hüküm no: 141 Orijinal metin no: [12a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Hasan’ın kocasından nafakasız ve mehirsiz boşandığı (muhâla‘a) Vech-i tahrîr-i hurûf oldur ki Nefs-i Üsküdar’da Bulgurlu mahallesinden Ahmed b. Mustafa meclis-i şer‘de zevcesi olan Emine bt. Hasan nâm hâtun muvâcehesinde bi-tav‘ihî ikrâr-ı sahîh-i şer‘î ve i‘tirâf-ı sarîh-i mer‘î kılıp dedi ki, mezbûre zevcem Emine benden mehr-i mü’eccelinden ve nafaka-i iddetinden küllî ve cüz’î nikâhla lâzım olandan ferâgat edip ve sağîr oğlu Mahmud’u târîh-i sicilden yedi yıl nafakasız besleyip nafakası mezbûrenin olmak üzerine bedel-i hul‘ benden hul‘ taleb eylediği ecilden ben dahi vech-i meşrûh üzerine mezbûre ile ihtila‘ edip mezbûre dahi bi-tav‘ihâ kabûl etti dedikde, mukırr-ı mezkûrun ikrârını vicâhen ve şifâhen mezbûre Emine dahi tasdîk ve tahkīk edip sıhhat-ı hul‘a hükm olunup mâ hüve’l-vâkı‘ gıbbe’t-taleb kayd-ı sicil olundu. Tahrîren fî evâili Muharremi’l-harâm sene 971. Şuhûdü’l-hâl: Mevlânâ Şeyh Muhyiddin b. Nefes ve Şeyh Bâli b. Mehmed Şeyh-i imâret-i Sultan ve Alagöz Bey b. Abdullah ve Mustafa Çelebi b. Abdi ve Mustafa b. Mehmed ve gayruhum mine’l-hâzırîn