Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 529 Hüküm no: 601 Orijinal metin no: [88a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. el-Müvvellâ Ali Efendi’nin vârislerinden çocukları Yahya Efendi ve Sâliha’nın terekeden olan evdeki hisselerini anneleri Hamide Hatun bt. Abdullah’a satıp terekedeki diğer hisselerinin bedelini de sulh yoluyla annelerinden tahsil ettikleri Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘den Mevlânâ İmâmzâde Mehmed Emin Efendi irsâl olunup ol dahi mahmiye-i İstanbul’da Tercümân Yunus Mahallesiʼnde sâkin iken bundan akdem vefât eden merhûm Mehmed Efendi b. el-müvellâ el-merhûm Ali Efendi’nin ilâ-vefâtihi sâkin olduğu menziline varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i şerîf ettikde müteveffâ-i mûmâ-ileyhin verâseti zevce-i menkûha-i metrûkesi Hamide Hatun bt. Abdullah b. Abdülmennan ile sulbî kebîr oğlu Yahya Efendi ve sulbiye kebîre kızı Sâliha Hatun’a münhasıra ve tashîh-i mes’elesi yirmi dört sehmden olup sihâm-ı mezbûreden üç sehmi zevcesi mezbûre Hamide Hatun’a ve on dört sehmi mezkûr Yahya Efendi’ye ve yedi sehmi merkūme Sâliha Hatun’a isâbeti tahakkukundan sonra mezbûr Yahya Efendi asâleten ve merkūme Sâliha Hatun’un zevci ve tarafından husûs-ı âti’z-zikre vekîl olup vekâleti İbrahim Efendi b. Veliyüddin ve Mehmed Efendi b. Hasan şehâdetleriyle şer‘an sâbit olan fahrü’l-müderrisîni’l-kirâm Ahmed Efendi b. Mustafa vekâleten meclis-i ma‘kūd-ı mezbûrda merkūme Hamide Hatun tarafından husûs-ı âti’z-zikri tasdîka vekîl olduğu nehc-i şer‘î üzere sâbit olan zahru’l-müderrisîni’l-kirâm Mehmed Efendi b. Kemaleddin mahzarında her biri bi’l-asâle ve bi’l-vekâle ikrâr ve takrîr-i kelâm edip müteveffâ-i mûmâ-ileyhin ile’l-vefât yedinde mülk ve hakkı olup ba‘de vefâtihi tashîh-i mezbûr üzere veresesine isâbet ve intikāl eden işbu bir tarafdan Ca‘ferzâde Mehmed Efendi mülkü ve baʻzan el-Hâc Mustafa ve Mehmed Efendi bahçesi ( ) ve baʻzan tarîk-i âm ve bir tarafdan Yusuf Efendi mülkü ve baʻzan Ahmed Ağa vakfı olan odalar ve iki tarafdan tarîk-i âm ile mahdûd dâhiliyede fevkānî dört bâb oda ve sofa ve tahtânî iki matbah ve bir kârgîr mahzen ve bir sagīr hamam ve bi’r-i mâ ve kenîf ve havlu ve hâriciyede fevkānî dört bâb oda ve dehlîz ve tahtânî [88b] üç ahır ve üç kenîf ve eşcâr-ı müsmire ve gayr-ı müsmireli bahçe ve üç bi’r-i mâ ve bahçe tarafında üç bâb fevkānî odayı müştemil menzilden tashîh-i mezbûr üzere yirmi dört sehmden yirmi bir sehm-i şâyi‘ini tarafeynden îcâb ve kabûlü hâvî bey‘-i kat‘î ile müvekkile-i mezbûre Hamide Hatun’a bin elli guruşa asâleten ve vekâleten bey‘ ve temlîk eylediğimizde ol dahi ber-vech-i muharrer iştirâ ve temellük ve kabûl eyledikden sonra semen-i mezbûr mutâlebesinden müvekkile-i mezbûrenin zimmetini bi’l-asâle ve bi’l-vekâle ibrâ ve iskāt eylediğimizden sonra müteveffâ-i mezbûrun terekesinde nukūd olmayıp ve sâir menkūl-i terekesine dahi müvekkile-i mezbûre Hamide Hatun vâzı‘atü’l-yed olmağla hisse-i irsiyyemizi ba‘de’d-da‘vâ ve’l-münâza‘a vesâtet-i muslihîn ile müvekkile-i mezbûre Hamide Hatun tehârüc-i şer‘î tarîkı üzere bizi üç yüz guruş üzerine sulh eyledikde biz dahi asâleten ve vekâleten sulh-ı mezbûru kabûl ve bedel-i sulh-ı <> mezbûru bi-kadri’l-hısas yedinden tamamen ahz u kabz eyledik min-ba‘d gerek menzil-i mahdûd-ı mezbûr ve gerek sâir menkūl-i tereke bi’l-cümle müvekkile-i merkūme Hamide Hatun’un mülk-i mahzı olmuşdur dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan el-Hâc Mehmed b. Hüseyin ve Hüseyin b. İsmail ile meclis-i şer‘a gelip alâ-[vukū‘ihî] inhâ ve takrîr etmeğin mâ-vaka‘a bi’t-taleb ketb olundu. Fî 23 min-Recebi’l-ferd sene 1121 Şuhûdü’l-hâl: Fahrü’l-müderrisîni’l-kirâm Antakîzâde Abdullah Efendi, Fahrü’l-müderrisîni’l-kirâm Abdurrahman Efendi, Umdetü’l-müderrisîn Mehmed Efendi b. Münir, Mefharü’l-müderrisîn diğer Mehmed Efendi, Fahrü’l-kuzât Mehmed Efendi b. Osman, Halil Efendi b. Ali, Hasan Ağa b. Mehmed, Mustafa Çelebi b. İsmail, Ahmed Ağa b. Ahmed, Hüseyin Efendi b. Mahmud ve gayruhum mine’l-huzzâr.