Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 528 Hüküm no: 600 Orijinal metin no: [88a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yani v. Yorgi’nin Maryora bt. Panayot’ta olan alacağını sulh yoluyla tahsil ettiği Bakkāl tâifesinden Yani v. Yorgi nâm zimmî mahfil-i kazâda Maryora bt. Panayot nâm Nasrâniye tarafından husûs-ı âti’l-beyâna vekîl olduğu Yanaki v. Dimitri ve Polihroni v. Yamandi nâm zimmîler şehâdetleriyle sâbit olan Polihroni v. Tanaş nâm zimmî mahzarında ikrâr ve takrîr-i kelâm edip merkūme Maryora zimmetinde nakd ve bakkal metâ‘ı semenlerinden cem‘an sekiz bin dokuz yüz elli dokuz akçe hakkım olmağla meblağ-ı mezbûru taleb ve da‘vâ ettiğimde ol dahi inkâr etmekle beynimizde nizâ‘-ı küllî vukū‘undan sonra muslihûn tavassut edip da‘vâ-yı mezkûremden merkūm Maryora benimle otuz beş guruş ve meclis-i sulhde mevcûd beynimizde ma‘lûm bir ferâce üzerine sulh oldukda ben dahi sulh-ı mezbûru ve bedel-i sulh olan meblağ-ı merkūm ile mârru’z--zikr ferâceyi merkūme Maryora’dan bi’t-tamam ahz u kabz ettiğimden sonra husûs-ı mezbûra müte‘allika cemî‘ da‘vâdan ben mezbûre Maryora’nın ve karındaşı Anton’un zimmetlerini ibrâ edip ol dahi benim zimmetimi ibrâ ve iskāt edip ve mezkûr Maryora’nın kızı Fotine’yi tezevvüc murâd etmişidim fâriğ oldum kime dilerse varsın dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 27 min-Recebi’l-mürecceb sene 1121 Şuhûdü’l-hâl: Süleyman Çavuş b. ( ), el-Hâc Mustafa Efendi tâbi‘-i efendi, el-Hâc Mehmed Çelebi b. ( ).