Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 531 Hüküm no: 603 Orijinal metin no: [88b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey b. Ali’nin kardeşleri Hüseyin, Ahmed ve İbrahim’le birlikte satın aldıkları evde kendisinin bir hissesi olduğunu tescil ettirdiği Mahmiye-i İstanbul’da Kefeli Mahallesiʼnde sâkin Mehmed Bey b. Ali nâm kimesne meclis-i şer‘-i şerîf-i enverde li-ebeveyn er karındaşları işbu ashâbü’l-kitâb Hüseyin ve Ahmed ve İbrahim nâm kimesneler mahzarlarında ikrâr ve takrîr-i kelâm edip mahalle-i mezbûrede vâki‘ bir tarafdan Ahmed Beşe menzili ve bir tarafdan Lütfi Hatun menzili ve bir tarafdan Odabaşıoğlu Ahmed menzili ve bir tarafdan tarîk-i âm ile mahdûd iki oda ve bir kuyu ve bir kenîf ve bir mikdâr bahçe ve havluyu müştemil mülk menzili karındaşlarım mezbûrûn ile müşterek mâlımızdan iki yüz kırk guruşa iştirâ ve müstakil mülküm olmak üzere hüccet-i şer‘iyye ettirmişidim lâkin menzil-i mezkûrun dört sehm i‘tibârıyla bir sehmi benim ve üç sehmi karındaşlarım mezbûrûnun müşterâları olup üç sehm-i mezkûrda benim aslâ ve kat‘â alâka ve medhalim yokdur keyfemâ yeşâ’ûn ve yahtârûn mutasarrıflar olsunlar dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 min-Şa‘bâni’l-mu‘azzam sene 1121 Şuhûdü’l-hâl: İmâm Ahmed Efendi b. Hüseyin, Mahmud Efendi b. Mustafa, el-Hâc Mustafa b. Ebûbekir, Nurullah Çelebi b. Hanîfi, Muslu Efendi b. Receb, Ali Beşe b. Mehmed, Mehmed Beşe b. Mehmed, Mustafa b. Şa‘ban ve gayruhum mine’l-huzzâr.