Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 531 Hüküm no: 604 Orijinal metin no: [88b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Muharrem b. Mustafa’nın evini Yeniçeri Ocağı’nın onuncu bölüğü para vakfına istiğlal yoluyla sattığı Mahmiye-i İstanbul’da Karabaş Mahallesi sükkânından olup Dergâh-ı âlî yeniçerileri ocağında sâbıkā başhalîfe olan mefharü erbâbi’t-tahrîr ve’l-kalem Mehmed Efendi b. Muharrem b. Mustafa tarafından husûs-ı âti’z-zikri ikrâra vekîl olduğu Ali Beşe b. Ahmed ve el-Hâc Ahmed Beşe b. Abdullah şehâdetleriyle şer‘an sâbit olan Mehmed Çelebi b. Ali nâm kimesne meclis-i şer‘-i şerîf-i enverde Dergâh-ı âlî yeniçerilerinin onuncu bölüğüne mahsûs olan oda neferâtına mevkūfe nukūda bi’l-fi‘il mütevellî olan işbu hâfızü’r-rakīm Hüseyin Çelebi b. Ali nâm kimesne mahzarında bi’l-vekâle ikrâr ve takrîr-i kelâm edip müvekkilim mezbûrun yedinde mülkü olup mahalle-i mezbûrede vâki‘ bir tarafdan Medîne-i münevvere Vakfı’ndan müvekkilim mezbûr Mehmed Efendi tasarrufunda olan arsa ve bir tarafdan Hürrem Çavuş Vakfı olan müte'ehhilîn odaları ve bir tarafdan Fâtıma Hatun tasarrufunda olan vakıf menzil ve bir tarafdan ba‘zan yine mezbûre Fâtıma Hatun’un müte'ehhilîn odaları ve ba‘zan Müezzinzâde Vakfı olup Mustafa Çelebi tasarrufunda olan menzil ile mahdûd büyût-ı adîdeyi müştemil mülk menzilini cümle tevâbi‘i ile mütevellî-i mezbûr Hüseyin Çelebi’ye bi-tarîkı’l-istiğlâl altı yüz guruşa bey‘ ve teslîm ol dahi vech-i muharrer üzere iştirâ ve kabz ve kabûl edip semeni olan meblağ-ı mezbûru yedinde olan mâl-ı vakf-ı mezbûrdan mütevellî-i merkūm bana def‘ ü teslîm ben dahi yedinden ahz u kabz eylediğimden sonra mütevellî-i mezbûr Hüseyin Çelebi menzil-i mahdûd-ı mezbûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamamına değin müvekkilim mezbûr Mehmed Efendi’ye doksan guruşa îcâr ve teslîm ol dahi ber-vech-i muharrer istîcâr ve kabûl eyledim dedikde gıbbe’t-tasdîkı’l-mer‘î müvekkil-i mezbûr Mehmed Efendi’nin oğlu Süleyman Ağa ve Halil Ağa b. Abdullah nâm kimesneler meclis-i şer‘de mütevellî-i mezbûr mahzarında her biri ikrâr ve takrîr-i kelâm edip menzil-i mezbûr hakīkatte rehin olmağla meblağ-ı merkūm altı yüz guruş ve ücret-i mezbûr doksan guruş ki cem‘an altı yüz doksan guruşa tarafeynden bi’l-emr ve’l-kabûl her birimiz kefâlet-i sahîha ile kefîl ve dâmin olduk dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 16 min-Şa‘bâni’l-mu‘azzam sene 1121 Şuhûdü’l-hâl: Ali Beşe b. Ali, el-Hâc Ahmed b. Abdullah, Bayram Beşe b. Ali, Hasan Odabaşı, Sarrac Mehmed Çelebi, el-Hâc Mustafa Müezzin, Semerci Osman Beşe, Mustafa Çelebi b. Şa‘ban ve gayruhum mine’l-huzzâr.