Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 149 Hüküm no: 206 Orijinal metin no: [16b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihaliç köyünün, Mustafa b. Koçi’nin timarı olduğu ve hakkını istemesi Vech-i tahrîr-i hurûf oldur ki Rumeli’nden Mustafa b. Koçi meclis-i şer‘a Pervâne b. Abdullah’ı ihzâr edip Paşa sancağına tâbi‘ kazâ-i Görice’ye tâbi‘ Mihaliç nâm karye benim tîmarım olup karye-i mezbûre re‘âyâsından Gönkinam nâm ra‘iyyetim olan kâfirin oğlu olup mezbûr Pervâne bana hakkımı vermez deyip defter-i cedîd-i hâkānî ibrâz edip zikr olan defter-i cedîdden Gönkinam mezbûr sipâhiye ra‘iyyet kayd olmağın gıbbe’l-inkâr udûl-i müslimînden Yeniçeri Nasuh b. Abdullah ve Yeniçeri Mustafa b. Abdullah edâ-i şehâdet edip dediler ki mezbûr Göni’nin mesfûr Pervâne sulbî oğlu [oldu]ğuna şâhidiz şehâdet dahi ederiz dediklerinde şâhidânın şehâdetleri ba‘de’t-tezkiye hayyiz-i kabûlde vâkı‘ olup gıbbe’t-taleb kayd-ı sicil olundu. Tahrîren fî evâhiri Muharremi’l-harâm sene 971. Şuhûdü’l-hâl: Mevlânâ Kasım Halîfe b. Ahmed ve Süleyman Subaşı b. Abdullah ve Mehmed Çelebi b. Hacı Ahmed