.:: İstanbul Kadı Sicilleri ::.


Üsküdar Mahkemesi 26 Numaralı Sicil (H. 970-971 / M. 1562-1563)
cilt: 7, sayfa: 183
Hüküm no: 302
Orijinal metin no: [22b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Muharrem b. Ali’nin, Mehmed b. Emir’e hırsızlık malı olduğundan şüphelenilen eşyalar getirdiği

Vech-i tahrîr-i hurûf oldur ki Mahmiye-i Amasya’dan Gümüşlüoğlu mahallesinden Mehmed b. Emir nâm kimesne meclis-i şer‘de Muharrem b. Ali nâm kimesne mahzarında bi’t-tav‘ ve’r-rızâ ikrâr ve i‘tirâf kılıp dedi ki, işbu köhne kırmızı çukayı ve bir mavi ferâceyi ve bir kın-ı kılıç ve yağmurluğu ve bir mavi kiçirek çukayı ve siyah ferâceyi ve bir mavi kutnîyi ve bir mavi mukaddem kuşağı ve bir ak sâdeyi mezbûr Muharrem bir torba ile almış getirip bana teslîm eyledi deyip ve mezbûr Muharrem yolda bir yağmurluk dahi almıştır sepetindedir deyip ve mezbûr Muharrem bana yolda gelirken eğer ben tutulursam seni demeyeyim sen tutulursan beni demeyesin deyu ahd etmişizdir dedikde, mezbûr Muharrem’e suâl olundukda inkâr edip mâ hüve’l-vâkı‘ Üsküdar Zaîmi Alagöz Bey b. Abdullah talebiyle kayd-ı sicil olundu. Tahrîren fî evâhiri Saferi’l-hayr sene 971.


Şuhûdü’l-hâl: Hayreddin b. Ahmed, Mehmed b. Mustafa, Mustafa Çelebi b. Abdi, Habib b. Behram, Ahmed b. Yunus, Hacı Mustafa b. Abdullah, Hamza b. Abdullah ve Sinan Bey b. Abdullah ve Sefer b. İlyas ve Mustafa b. Mehmed ve gayruhum