|
Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 186 Hüküm no: 310 Orijinal metin no: [23a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Pervane b. Abdullah’ın, Ahmed b. Bayezid’e küfür ettiği
Vech-i tahrîr-i hurûf oldur ki Hamza Fakih mahallesinden Ahmed b. Bayezid nâm kimesne meclis-i şer‘de Pervâne b. Abdullah nâm kimesne mahzarında da‘vâ edip dedi ki, mezbûr Pervâne bana gidi dedi hakkım taleb ederim dedikde, mezbûr Pervâne’ye suâl olundukda inkâr edip mezbûr Ahmed’in da‘vâsına mutâbık beyyine taleb olundukda udûl-i müslimînden Mustafa b. Hacı ve Usta Bâli b. Abdullah nâm kimesneler edâ-i şehâdet edip dediler ki mezbûr Pervâne merkūm Ahmed’e bire gidi dedi biz şâhidiz şehâdet ederiz dediklerinde mezbûrânın şehâdetleri gıbbe’t-tezkiye hayyiz-i kabûlde vâkı‘ olup gıbbe’t-taleb kayd-ı sicil olundu. Tahrîren fî evâili Rebî‘ilevvel sene 971.
Şuhûdü’l-hâl: Şaban b. Mehmed eş-Şirvânî ve Nasuh b. Abdullah ve Süleyman b. Mahmud ve Mehmed b. Nasuh ve Mustafa b. Emir ve Mehmed Çelebi b. Hasan ve Ali b. Behram ve Mustafa b. Mehmed ve gayruhum mine’l-hâzırîn
|