Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 545 Hüküm no: 619 Orijinal metin no: [91b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in geçinemediği kocası Salih b. Mehmed’den boşandığı Mahmiye-i İstanbul’da Camcı çeşmesi kurbünde Ca‘fer Subaşı Mahallesi'nde sâkine olup zâtı İbrahim b. Osman ve Ebûbekir b. Mehmed nâm kimesneler ta‘rîfleriyle mu‘arrefe olan Âişe bt. Mehmed nâm hatun meclis-i şer‘-i şerîf-i enverde zevc-i dâhili işbu sâhibü’l-kitâb Salih b. Mehmed nâm kimesne mahzarında ikrâr-ı tâm ve takrîr-i kelâm edip zevcim mezbûr Salih ile beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh olan on üç guruş mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm kendi üzerime olmak üzere mezbûr Salih ile muhâla‘a-i sahîha-i şer‘iyye ile hul‘ olduğumda ol dahi minvâl-i muharrer üzere hul‘-ı mezbûru kabûl eylediğinden sonra hukūk-ı zevciyete müte‘allika âmme-i de‘âvî ve mutâlebât ve kâffe-i eymân ve muhâsamâtdan ben mezbûr Salih’in zimmetini ibrâ-i âmm-ı kātı‘u’n-nizâ‘la ibrâ ve iskāt eyledim ve mezbûr Salih dahi kezâlik hukūk-ı zevciyete müte‘allika cemî‘ de‘âvî ve mutâlebâtdan benim zimmetimi ibrâ ve iskāt eyledi fîmâ-ba‘d birbirimiz ile vechen mine’l-vücûh da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 10 min-şehri Rebî‘ülâhir sene 1121 Şuhûdü’l-hâl: İbrahim b. Osman, Ebûbekir b. Mehmed, Yusuf Çavuş b. Mustafa, Abdullah b. Mustafa, Ali b. Mehmed, Süleyman b. Abdullah ve gayruhum mine’l-huzzâr.