Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 544 Hüküm no: 618 Orijinal metin no: [91b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Hasan b. Abdullah’ın varisleri olan çocukları Mehmed ve Fâtıma’nın kendilerine intikal eden Neslişah Sultan Mahallesi’ndeki evi İbrahim Beşe b. Osman’a sattıkları. Mahmiye-i İstanbul’da Neslişah Sultan Mahallesi'nde sâkine iken bundan akdem vefât eden Havvâ bt. Hasan b. Abdullah nâm hatunun verâseti sadrî kebîr oğlu Mehmed ve sadriye kebîre kızı Fâtıma’ya münhasıra olduğu şer‘an zâhir ve mütehakkık oldukdan sonra mezbûr Mehmed ile zâtı ta‘rîf-i şer‘î ile mu‘arrefe olan mezbûre Fâtıma meclis-i şer‘-i şerîf-i enverde işbu râfi‘u’l-kitâb İbrahim Beşe b. Osman nâm kimesne mahzarında ikrâr ve takrîr-i kelâm edip vâlidemiz müteveffât-ı mezbûrenin terekesinden olup mahalle-i mezbûrede vâki‘ bir tarafdan Şahbaz Hatun mülkü ve iki tarafdan müşteri-i mezbûr mülkü ve bir tarafdan ba‘zan bostan ve ba‘zan tarîk-i âm ile mahdûd bir bâb oda ve bir sofa ve bir kuyu ve bir kenîf ve bir hayât ve bir mikdâr havluyu müştemil mülk-i mevrûsumuz olan menzilimizi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûr İbrahim Beşe’ye elli beş guruşa bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr elli beş guruşu her birimiz bi-kadri’l-hısas mezbûr İbrahim Beşe yedinden tamamen ahz u kabz eyledik ba‘de’l-yevm menzil-i mahdûd-ı mezkûr mezbûr İbrahim Beşe’nin mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 19 min-Şa‘bâni’l-mu‘azzam sene 1121 Şuhûdü’l-hâl: Süleyman Çelebi b. Mustafa, Habib Çelebi b. Mehmed, Mehmed Çelebi b. Musa, İbrahim Beşe b. Mehmed, Mehmed Çelebi b. Ahmed ve gayruhum mine’l-huzzâr.