Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 546 Hüküm no: 621 Orijinal metin no: [92a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia bt. Abdullah’ın vârisi oğlu Hacı İsmail b. Hacı Şa‘ban’ın annesinden intikal eden evi Ayvaz v. Hristo ile Döğenci v. Harsoko’ya sattığı Mahmiye-i İstanbul’da Ali Paşa-yı Atîk Mahallesi'nde sâkine iken bundan akdem vefât eden Râbia bt. Abdullah nâm hatunun sadrî kebîr oğlu ve hasran vârisi olan el-Hâc İsmail b. el-Hâc Şa‘ban nâm kimesne meclis-i şer‘-i şerîf-i enverde işbu râfi‘iyü’s-sifr Ayvaz v. Hristo ve Döğenci v. Harsoko nâm zimmîler muvâcehelerinde ikrâr ve takrîr-i kelâm edip mahmiye-i mezbûrede Çukurbostan Mahallesi'nde vâki‘ bir tarafdan Zühre Hatun menzili ve bir tarafdan Âişe Hatun menzili ve bir tarafdan bostan ve bir tarafdan tarîk-i âm ile mahdûd iki bâb fevkānî oda ve iki bâb tahtânî oda ve iki sofa ve bir kenîf ve havluyu müştemil menzil ile’l-vefât vâlidem müteveffât-ı mezbûrenin yedinde mülkü olup ba‘de vefâtihâ bana isâbet etmekle hâlâ menzil-i mahdûd-ı mezbûru cümle tevâbi‘i ile tarafeynden îcâb ve kabûlü hâvî bey‘-i kat‘î ve iştirâk-i seviyy üzere mezbûrân Döğenci ve Ayvaz’a yüz otuz beş guruşa bey‘ ve teslîm ve temlîk onlar dahi vech-i meşrûh üzere iştirâ ve tesellüm ve temellük ve kabz ve kabûl eylediklerinden sonra semeni olan meblağ-ı mezbûr yüz otuz beş guruşu mezbûrân yedlerinden tamamen ahz u kabz eyledim ba‘de’l-yevm menzil-i mahdûd-ı mezbûrda kat‘â alâkam kalmayıp mezbûrân Döğenci ve Ayvaz’ın ale’l-iştirâki’s-seviyy mülk-i müşterâları olmuşdur keyfe mâ yeşâ ve yehtâr mutasarrıf olsunlar dedikde gıbbe’t-tasdîkı’l-mer‘î mâ-hüve’l-vâki‘ bi’t-taleb ketb olundu. Fî 19 min-Şa‘bâni’l-mu‘azzam sene 1121 Şuhûdü’l-hâl: Yiğitbaşı Ahmed Çelebi b. Mehmed, Süleyman Çelebi b. Ahmed, Münâdî Mehmed b. Mustafa, Mehmed Çelebi b. Mustafa, Hüseyin b. Şa‘ban, Mustafa Çelebi b. Şa‘ban, Ali Çelebi b. İvaz, Halil b. İbrahim, Hasan Çelebi b. Mustafa, Mehmed b. Mehmed ve gayruhum mine’l-huzzâr.