Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 547 Hüküm no: 622 Orijinal metin no: [92a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Mahmud’un çocukları Mustafa ve Mehmed’in biriken nafakalarını boşandığı kocası Ali Çelebi b. Hasan’dan sulh yoluyla teslim aldığı Mahmiye-i İstanbul’da Molla Hüsrev Mahallesi'nde sâkine zâtı ta‘rîf-i şer‘î ile mu‘arrefe olan Havvâ bt. Mahmud nâm hatun mahfil-i kazâda zevc-i sâbıkı işbu râfi‘u’l-vesîka Ali Çelebi b. Hasan nâm kimesne mahzarında ikrâr ve takrîr-i kelâm [edip] mezbûr Ali Çelebi’nin firâşından hâsıl ve benden mütevellid bi-hakkı’l-hıdâne hacr u terbiyemde işbu Mustafa ve Mehmed’in nafaka-i mefrûza-i müstedânelerinden târih-i kitâba gelince seksen sekiz guruş müctemi‘ olmuşdur deyü mezbûr Ali Çelebi’den da‘vâya tasaddî ettiğimde beynimizde münâza‘ât-ı kesîre cereyân etmişidi el-hâletü hâzihî beynimizde muslihûn tavassut edip da‘vâ-yı mezkûremden beni mezbûr Ali Çelebi ile kırk guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr kırk guruşu mezbûr Ali Çelebi yedinden tamamen ahz u kabz edip husûs-ı mezbûra ve târih-i kitâba gelince nafaka-i mezkûre da‘vâsına müte‘allika âmme-i da‘vâdan mezbûr Ali Çelebi’nin zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 20 min-Şa‘bâni’l-mu‘azzam sene 1121 Şuhûdü’l-hâl: Osman Beşe b. Hasan, Mehmed Beşe b. Hasan, İsmail Çelebi b. Ahmed, Molla Ahmed b. Mahmud, Ali b. Bâli ve gayruhum mine’l-huzzâr. Sahh, sahh, sahh