.:: İstanbul Kadı Sicilleri ::.


Üsküdar Mahkemesi 26 Numaralı Sicil (H. 970-971 / M. 1562-1563)
cilt: 7, sayfa: 212
Hüküm no: 379
Orijinal metin no: [30a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ali b. Sefer’in, Nesimi b. İsa’ya ölen babasından kalan gemi hissesini vermediği

Vech-i tahrîr-i sicil oldur ki Karye-i Dudullu’dan Nesîmi b. İsa nâm kimesne karye-i mezbûreden Ali b. Sefer nâm kimesneyi meclis-i şer‘a ihzâr edip takrîr-i da‘vâ kılıp eyitdi ki merhûm babamız İsa iştirâk olduğu sefîneyi bey‘ edip bize âid olan hissemizi vermeyip üzerinde kaldı hissemizi taleb ederiz dedikde, mezbûr Ali b. Sefer bi’l-mukābele inkâr edicek mezbûr Nesîmi’den beyyine taleb olundukda udûl-i müslimînden İbrahim b. Mehmed ve Devlethan b. Ahmed nâm kimesneler şöyle edâ-i şehâdet-i şer‘iyye kılıp eyitdiler ki biz şâhidleriz şehâdet dahi ederiz ki merhûm İsa’nın mezbûr Ali b. Sefer nâm kimesne sattığı sefînede sülüs hissesi vardır mezbûrun üzerindedir deyu şehâdet ettikleri ecilden şâhidân-ı mezbûrânın şehâdetleri ba‘de’t-tezkiyeti’ş-şer‘î ve’t-tahlîfi’l-âdî hayyiz-i kabûlde vâkı‘ olup, mezkûr sefînenin hissesinin akçesi mezbûr Ali b. Sefer’den hükm olunup mezkûr Nesîmi talebiyle sebt-i sicil olundu. Tahrîren fî evâhiri Rebî‘ilevvel sene 971.


Şuhûdü’l-hâl: Nebi Halîfe el-Mü’ezzin, Sefer b. İskender, Ahmed b. Hüseyin, Mustafa Kaymagî, Nuh Bâli b. Musa, Cafer b. Ramazan