Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 556 Hüküm no: 630 Orijinal metin no: [93b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmailgeçidi aşarından İstanbul’a nakledilecek buğdayı getirecek olan sefînelerden Marmaralı Manolaki’nin sefînesinin ancak iki bin keyl alabileceğinin tesbit edildiği Ma‘rûz-ı dâ‘îleridir ki İsmailgeçidi kazâsında vâki‘ Dârü’s-sa‘âde Ağası Mehmed Ağa’nın evkāfından olup Ali Ağa’nın iltizâmında olmağla a‘şâr-ı şer‘iyyesinden hâsıl keyl-i İsmailî altı bin keyl beher keyli sekizer buçuk [keyl-i] İstanbulî olmağla elli bir bin keyl hınta eder müteferrik sefîneler ile geldikce tahmîl olunacak sefînelerin reislerinin kefîlleri alınıp her bir sefîne ba‘de’t-tahmîn ne mikdâr hınta alır i‘lâm oluna deyü buyrulmağın imtisâlen-leh kıbel-i şer‘den hâlâ kapanda nâibimiz Abdurrahman Efendi dâ‘îleri ve vukūf-ı tammı olan Reisler kethüdâsı el-Hâc Mahmud ve Yiğitbaşıları Ahmed Çelebi ile Ortaköy’de merbût Marmaralı Bahar nâm zimmînin sefînesi altı bin keyl hınta ancak alır deyü ba‘de’l-müşâhede her birisi tahmîn ve ihbâr ettiklerin nâib-i mûmâ-ileyh dâ‘îleri tarafımıza haber vermeğin huzûr-ı [âlîlerine] i‘lâm olundu bâkī fermân hazret-i men lehü’l-emrindir. Sahh, sahh, sahh