Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 558 Hüküm no: 633 Orijinal metin no: [94b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Samanveren Vakfı’ndan olan bir evle Telhisîzâde Kâtib Mustafa Efendi’nin mülk evinin istibdaline verilen izni havi İstanbul kadısına hüküm Akdâ kudâti’l-Müslimîn evlâ vülâti’l-muvahhidîn ma‘deni’l-fazli ve’l-yakīn hüccetü’l-hakkı ale’l-halkı ecma‘în vârisü ulûmi’l-enbiyâi ve’l-mürselîn el-muhtassu bi-mezîd-i inâyeti’l-Meliki’l-Mu‘în Mevlânâ İstanbul kādısı zîde fezâiluhû tevkī‘-i refî‘-i hümâyûn vâsıl olıcak ma‘lûm ola ki Südde-i sa‘âdetime mektûb gönderip müteveffâ Samanveren evkāfının mütevellîsi olan kıdvetü’l-emâsil ve’l-akrân Mustafa zîde kadrühu meclis-i şer‘-i şerîfe varıp evkāf-ı mezbûreden olup mahmiye-i İstanbul’da müteveffâ-i merkūmun kendi Mahallesi'nde vâki‘ bi-hesâb-ı terbî‘î iki yüz seksen beş buçuk zirâ‘ arsalı tahta kerpiçden mebnî fevkānî bir oda ve bir sofa ve tahtânî bir kenîf ve bir mikdâr havluyu müştemil vakıf menzil yine mahrûse-i İstanbul’da Yavaşça Şahin Mahallesi’nde bi-hesâb-ı terbî‘î üç yüz yirmi buçuk zirâ‘ arsalı tabaka-i ulyâsında nîm sofalı bir kebîr oda ve bir yan sofası ve tabaka-i vustâsında iki oda ve dehlîz ve bir kenîf ve tabaka-i süflâsında bir matbah ve odunluk ve havlu ve kenîfi müştemil mülk menzile mutasarrıf olup düstûr-ı ekrem müşîr-i efham nizâmü’l-âlem nâzımü menâzımü’l-ümem Vezîriazâm Mustafa Paşa edâmallâhu te‘âlâ iclâlehunun mektûbçuluğu hizmetinde olan Dîvân-ı âlî-şânım kâtiblerinden iftihâru erbâbi’t-tahrîr ve’l-kalem muhtâru ashâbi’t-takrîr ve’r-rakam Telhîsîzâde Kâtib Mustafa zîde mecdühû ile mübâdele murâd etmeleriyle mülk menzil vakıf olan menzilden binâ ve kıymet ve rağbet ve vüs‘at cihetlerinden evlâ ve ezyed olup istibdâl vakfa evlâ ve enfa‘ olmağla mübâdele olunmak bâbında izn-i hümâyûnum verilmek ricâsına arz eylediğin ecilden vech-i meşrûh üzere istibdâl olunmak emrim olmuşdur buyurdum ki hükm-i şerîfimle ( ) vusûl buldukda bu bâbda sâdır olan emrim üzere amel edip dahi husûs-ı mezbûra mukayyed olup göresin mülk olan menzil vakıf olan menzilden binâ ve rağbet ve kıymet ve vüs‘at cihetlerinden evfer ve ekser ve ezyed olup istibdâl vakfa enfa‘ ve evlâ olup ve tarafeynin rızâları olmağla istibdâli tecvîz eyleyen fukahânın kavilleri üzere vakıf mülk ve mülk vakıf olup vakf-ı ûlânın şürûtu vakf-ı sânîde icrâ olunmak üzere istibdâl edip tarafeyne hüccet veresin şöyle bilesin alâmet-i şerîfe i‘timâd kılasın. Tahrîren Fî-evâsıtı şehri Cumâdelâhire sene tis‘în ve mi'ete ve elf. Be-makām-ı Kostantıniyyeti’l-mahrûse Sahh, sahh, sahh.