Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 559 Hüküm no: 634 Orijinal metin no: [95a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmailgeçidi kazası evkafı mahsulünden olan zahîrenin belirlenen kaptanların gemileriyle İstanköy, Kıbrı, Sayda ve Trablus’a nakledilmesi Sahh İstanbul kādısı fazîletlü efendi zikr olunan altı bin İsmail kilesi kaç bin İstanbulî keyl eder gemiciler kethüdâsı ma‘rifetiyle mezkûr reislerin İstanköy ve Kıbrıs ve Sayda ve Trablus’a götürüp kādılarından arz getirmek üzere yarar kefîllerin alıp i‘lâm eyleyesiz deyü buyruldu. [Fî] 13 R sene [1]121 Devletlü sa‘âdetlü sultanım hazretleri sağ olsun İsmailgeçidi evkāfı tevliyeti iki seneden beri kullarının uhdesinde olup iki senede evkāf-ı mezbûre kurâlarından on beş yirmi bin İsmail kilesi mahsûlât hâsıl ve der-anbar olunup lâkin bi-lütfillâhi te‘âlâ bu taraflar râygān olduğundan nâşî ol mikdâr mahsûlât-ı vakf mahall-i mezbûrda hâli üzere nâ-fürûht kalıp kimesne de rağbet etmediğinden ba‘zı ba‘zı böceklenip birkaç gün dahi böyle kalırsa itlâfa bâdî ve bu kullarına külliyet ile gadr olup evkāf-ı şerîfin dahi ibtâline bâ‘is olmağla merâhim-i aliyyelerinden Bahr-ı sefîd sefîneleri rüesâlarından ( ) reislerin altı kıt‘a sefînelerine bu tarafda Yeniköy nâm mahalde vakf-ı mezbûr mahsûlâtından altı bin İsmail kilesi hınta tahmîl ve zikr olunan rüesâların dahi yarar kefîlleri ahz ve Bahr-ı sefîd cânibinde mahal ve münâsib olan cezâir ve adalarda fürûht ve sicill-i mahfûza kaydolup kādısından dahi arzı alınmak üzere merkūm reislerin beher neferine bir def‘ada başka başka fermân-ı âlî-şân inâyet ve ihsân buyrulmak bâbında emr ü fermân devletlü sa‘âdetlü sultanım hazretlerinindir. Bende Sahh, sahh, sahh.