Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 562 Hüküm no: 638 Orijinal metin no: [95b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tekfurdağı’ndan bir keyl buğdayı alıp Kudüs’e götürüp Yafa İskelesi’nde satması için Nikola v. Yorgi’ye izin verildiği İstanbul kādısı fazîletlü efendi mahall-i mezkûra götürdüğüne arz ve hüccet getirmek üzere yarar kefîline alıp tescîl ve i‘lâm eyleyesin deyü buyruldu. Ma‘rûz-ı dâ‘îleridir ki Tekfurdağı’ndan bin keyl buğdayı Sönbeki adasından Nikola v. Yorgi nâm reis iştirâ ve furkatesine [firkatesine] tahmîl ve Kuds-i şerîf’de Yafa İskelesi’ne götürüp anda bey‘ ve Kuds-i şerîf kādısından hüccet ve arz alıp getirmesine İstanbul gümrüğünde kayık reisi olan İbrahim Ağa b. Abdullah kefîl olup ona dahi Gemiciler yiğitbaşısı Ahmed b. İsmail ve Tophâne’de Tomtom Mahallesi'nde sâkin el-Hâc Abdullah b. Mustafa kefîl oldukları hâk-i pâylarına i‘lâm olundu. Fî 16 Rebî‘ülâhir sene 1121 Devletlü ve sa‘âdetlü sultanım hazretleri sağ olsun Hâlâ Kuds-i şerîf’e gidecek kâşîleri taraf-ı mîrîden navl taleb eylememek üzere ancak Yafa İskelesi’nde hıntanın revâyici olduğundan bu tarafdan bin keyl hınta alıp iskele-i mezbûrede fürûht için götürmek ve âhara fürûht eylememek üzere bu tarafdan kavî kefîl verip ve mahallinden dahi arz ve hüccet getirmek üzere Nikola nâm zimmî tâlib olmağla bu tarafdan i‘timâd olunur kefîl verip ve mahallinden dahi ma‘mûlün-bih arz ve hüccet getirmek üzere izn-i âlîleri buyrulur ise kimesne mümâna‘at eylememek üzere fermân-ı âlîleri ihsân buyrulmak bâbında emr ü fermân devletlü ve sa‘âdetlü sultanım hazretlerinindir. Bende Mustafa Emîn-i gümrük hâlâ