Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 562 Hüküm no: 637 Orijinal metin no: [96a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Selim Han evkafından Varna mukataası mahsulünün kefilleri alınan kaptanların gemileriyle Varna’dan alınıp Sakız, Kuşadası ve Karabağlar’a nakillerine izin verildiği İstanbul kādısı fazîletlü efendi gemiciler kethüdâsı ma‘rifetiyle hüccet-i şer‘iyye getirmek üzere mu‘ayyen kefîllerin alıp i‘lâm eyleyesin deyü buyruldu. Devletlü ve sa‘âdetlü sultanım hazretleri sağ olsun Bu kulları Sultan Selim Vakfı’ndan Varna ve tevâbi‘i mukāta‘asın deruhde edip hâsılı ekserî mahsûl olmağla vakf-ı şerîfe ve bu kullarına merhameten on beş bin keyl buğday üç sefîne ile Sa[kız] ve Kuşadası ve Karabağlar nâm mahalle naklolunmağa fermân-ı âlî ihsân buyrulmağın [95b] kaydolunan reisler mahsûlü kalîl bahâ ile teklîf etmeleriyle zîr-i tahrîrde olan dört nefer reisler üçer akçe izdiyâd ile tâlib olmalarıyla dört sefîne ta‘yîn buyrulup mu‘tâd üzere reislerin kefîlleri alınıp ihsân olunan fermân-ı âlî tecdîd buyrulmak bâbında fermân-ı şerîfleri ricâ olunur bâkī fermân devletlü efendimindir. Bende Mustafa Mültezim-i Varna Ma‘rûz-ı dâ‘îleridir ki Fermân-ı âlîleri üzere hâlâ sefîne reislerinden Marmaralı Nefoset? v. Yasur ve Yanaki v. Mavrodi ve Yorgaki v. Todori ve Nehuset v. Manolaki nâm zimmîler merhûm Sultan Selim Hân tâbe serâhu evkāfından Mankalye ve Varna’da olan buğdayı çenber tâ‘bir olunur sefînelerine tahmîl ve Sakız ve Kuşadası’na ve Karabağlar’a götürüp bey‘ edip kādılarından hüccet getirmek üzere birbirlerine kefîl olduklarından sonra merkūmûn zimmîlere dahi Yemiş İskelesi’nde vâki‘ İzmir bâzergânlarından el-Hâc Ahmed b. Mehmed ve Peykhâne’de sâkin olup Sipâhî sûkunda vâki‘ tüccârdan el-Hâc Mustafa b. Hüseyin ve Sofular Mahallesi'nde sâkin Keresteci Mahmud b. Mustafa Gemiciler yiğitbaşısı Ahmed Çelebi b. İsmail ma‘rifetiyle kefîl oldukları hâk-i pâylarına i‘lâm olundu. Fî 28 Rebî‘ülâhir sene 1121 Bâ-mühr-i hazreti efendi