|
Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 277 Hüküm no: 562 Orijinal metin no: [47b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ölen Mustafa Çelebi b. Mehmed’in vârisi olmadığından yerlerinin zaim tarafından Ali Bey’e satıldığı
Vech-i tahrîr-i hurûf budur ki Kazâ-i Yoros’a tâbi‘ İncirli nâm hâssa karye zaîmi ve nefs-i Üsküdar zaîmi olan Alagöz Bey b. Abdullah meclis-i şer‘a Dergâh-ı âlî çavuşlarından Ali Çavuş b. Abdullah mahzarında bi-tav‘ihî ikrâr ve i‘tirâf edip karye-i mezbûreye tâbi‘ yerler ki tasarruf eden Mustafa Çelebi b. Mehmed fevt olup evlâd-ı zükûru kalmayıp tasarrufunda olan yerleri ki inde’l-ahâlî hudûdu ma‘lûmdur tapuya müstehak olmağın mezbûr Ali Bey’e altı bin yüz akçe tapuya verip meblag-ı merkūmu bî-kusûr kabz edip zikr olan yerleri teslîm ettim dedikde, müşârunileyh çavuş mukırr-ı mezbûru tasdîk ettikde sıhhat-ı tapuya hükm olunup gıbbe’t-taleb kayd-ı sicil olundu. Tahrîren fî 11 Cemâziyelevvel li-sene 971.
Şuhûdü’l-hâl: Ali Usta b. Abdullah ve Hamza b. Abdullah ve Cafer Usta b. Abdullah ve Yeniçeri Ramazan b. Abdullah ve Yeniçeri Turgut b. Abdullah ve Yeniçeri Mehmed b. Abdullah ve Hüsrev b. Abdullah ve gayruhum mine’l-hâzırîn
|