.:: İstanbul Kadı Sicilleri ::.


Üsküdar Mahkemesi 26 Numaralı Sicil (H. 970-971 / M. 1562-1563)
cilt: 7, sayfa: 277
Hüküm no: 563
Orijinal metin no: [48a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ölen Melek Hatun’un ölmeden önce Eymir Halife b. Hasan’ı terekesine vasî tayin ettiği

Vech-i tahrîr-i hurûf budur ki Nefs-i Üsküdar’dan Eymir Halîfe b. Hasan meclis-i şer‘a zaîmü’l-vakt olan Alagöz Bey b. Abdullah’ı ihzâr edip kasaba-yı mezbûreden Evliyâ mahallesinde müteveffiye olan Melek Hâtun bt. Abdullah beni vâsiyy-i muhtâr edip mezbûr hâtunun muhallefâtından cümle esbâbını zabt edip cümle muhallefâtı dört yüzden ziyâde akçe olup meblag-ı mezbûrdan sülüsünü taleb ederim dedikde, gıbbe’l-inkâr mezbûr Eymir’in da‘vâsına mutâbık beyyine taleb olundukda udûl-i müslimînden Hasan b. Abdullah ve Hüseyin b. Yusuf mezkûre hâtun mesfûr Eymir’i vâsiyy-i muhtâr edip fevt olduğuna şâhidleriz ve şehâdet dahi ederiz dediklerinde şâhidân-ı mezbûrânın şehâdetleri ba‘de’t-tezkiye hayyiz-i kabûlde vâkı‘ olup gıbbe’t-taleb kayd-ı sicil olundu. Tahrîren fî 11 Cemâziyelevvel li-sene ihdâ ve seb‘îne ve tis‘a-mi’e.


Şuhûdü’l-hâl: Ve Behlül Halîfe b. Süleyman ve İskender b. Abdullah ve Yusuf b. Budak ve gayruhum