.:: İstanbul Kadı Sicilleri ::.


Üsküdar Mahkemesi 26 Numaralı Sicil (H. 970-971 / M. 1562-1563)
cilt: 7, sayfa: 291
Hüküm no: 602
Orijinal metin no: [51b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Âzatlı köle Mesih’in ölümünün araştırılması

Vech-i tahrîr-i hurûf budur ki Dergâh-ı âlî çavuşlarından Üveys Çavuş b. Abdullah ve Hacı İsa b. Abdullah meclis-i şer‘a gelip Mahmiye-i Üsküdar’a tâbi‘ merhûm ve magfûrun leh Abdullah Ağa Evkāfı’ndan İstavros nâm karyenin şarkî cânibinde Cemelce nâm mevzi‘ kurbunda mecrûhen maktûl olan Mesih nâm âzâd ettiğim oğlanı birkaç kimesneler mahmiye-i İstanbul’dan getirip katl etmişler mezbûr Mesih hayâtda iken karye-i mezbûreden ba‘zı kimesneler varıp onlara haber vermiş onlardan çavuş-ı mezbûr mübâşeretiyle sual olunmasın taleb ederim dedikde, mezbûr Hacı İsa ve mübâşir-i mezbûr ile karye-i mezbûreye varıp hâzır olanlardan sual olundukda karye-i mezbûre imâmı Mevlânâ Muslihiddin Halîfe b. Hasan ve Nâzır Turgut b. Hızır mezbûr mecrûh hayâtda iken üzerine varıp kendiden ahvâlini sual ettiğimizden Hasan ve Haydar ve Haseki hamâmında Nâzır Sefer nâm kimesneler Mahmiye-i İstanbul’dan beni ayartıp buraya getirip onlar mecrûh eylediler dedi deyu haber verdikleri gıbbe’t-taleb kayd-ı sicil olundu. Tahrîren fî 20 Cemâziyelevvel li-sene ihdâ ve seb‘îne ve tis‘a-mi’e.


Şuhûdü’l-hâl: Ahmed Bey b. Abdullah ve Yeniçeri Ferhad b. Abdullah ve Hüseyin b. Hacı ve Hüseyin Bey b. Abdullah ve gayruhum mine’l-hâzırîn