|
Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 294 Hüküm no: 609 Orijinal metin no: [52b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hamza b. Abdullah’ın, İhsan Hatun bt. Mehmed Vakfı’na olan borcunu ödediği
Vech-i tahrîr-i hurûf budur ki Mahmiye-i İstanbul’dan merhûme İhsan Hâtun bt. Mehmed Vakfı’na bi’l-fi‘l mütevellî olan Ali Çelebi b. Ömer meclis-i şer‘de Hamza b. Abdullah mahzarında bi-tav‘ihî ikrâr edip mezbûr Hamza’dan mezbûre hâtun evkāfına sâbıkā mütevellî olan Hasan b. Abdullah Mahmiye-i Üsküdar’da Sultan Mehmed -tâlet bekāhâ- hazretleri câmi‘-i şerîf mahallesinde ma‘lûmetü’l-hudûd olan evini sene isnâ ve tis‘a-mi’e Zilhiccesi evâhirinde istiğlâl tarîki ile on bin akçeye alıp yine kendiye ba‘de’t-tahliye bin akçeye icâreye vermiş idi hâlâ mezbûr Hamza’dan on bin akçe asıldan ve bin akçe icâreden alıp yine evin bey‘ini fesh edip zikr olan evi mezbûr Hamza’ya teslîm edip mezbûr Hamza’nın zimmetinde ev bahâsından ve icâreden bir akçe ve bir habbe bâki kalmadı dedikde, mukırr-ı mezbûru mukarrun lehü’l-mesfûr ikrâr-ı meşrûhunda tasdîk ve tahkīk ettikde sıhhat-ı ikrâra hükm olunup gıbbe’t-taleb kayd-ı sicil olundu. Tahrîren fî 22 Cemâziyelevvel sene 971.
Şuhûdü’l-hâl: Eynehan b. Osman, Keyvan Bey b. Abdullah, Hamza b. Mehmed Şeyh-i imâre, Hasan Bey b. Abdullah, Hasan Halîfe b. Murad el-Hatîb, Şaban b. Mehmed
|