|
Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 294 Hüküm no: 610 Orijinal metin no: [52b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hamza b. Abdullah’ın vakıftan aldığı borca karşılık evini rehin verdiği
Vech-i tahrîr-i hurûf budur ki Mahmiye-i Üsküdar’dan fahrü’l-emâsil vekîl-i harc olan Hamza b. Abdullah meclis-i şer‘de fahrü’l-emâcid ve’l-ekârim câmi‘-i şerîf mütevellîsi Mehmed Bey -zîde kadruhû- câniblerinden vekîl-i şer‘îsi olan Keyvan Bey b. Abdullah mahzarında bi-tav‘ihî ikrâr ve i‘tirâf edip mezbûr Mehmed Bey’den on bir bin sekiz yüz akçe karz alıp Mahmiye-i mezbûreden Sultan -tâlet bekāhâ- Câmi‘-i Şerîf mahallesinde hudûd inde’l-ahâlî ma‘lûme olan evimi ve kapudan paşa hazretleri bahçesi yanında hudûd inde’l-ahâlî ma‘lûme olan bağımı rehin verip teslîm ettim dedikde, mukırr-ı mezbûru mukarrun lehü’l-mezkûr ikrâr-ı meşrûhunda tasdîk ve tahkīk edip ve zarar-ı mâlına mezbûr Hamza Bey’in oğulları Ali Bâli ve Mehmed kefîl olduklarında mâ hüve’l-vâkı‘ gıbbe’t-taleb kayd-ı sicil olundu. Vaka‘a’t-tahrîr fî evâhiri Cemâziyelevvel sene 971.
Şuhûdü’l-hâl: Şeyh Hamza b. Mehmed ve Mevlânâ Hasan Halîfe b. Murad, Beşir Halîfe b. Hüsam, Hasan Halîfe b. Süleyman, Eynehan b. Osman, Hasan Bey b. Abdullah ve gayruhum
|