.:: İstanbul Kadı Sicilleri ::.


Üsküdar Mahkemesi 26 Numaralı Sicil (H. 970-971 / M. 1562-1563)
cilt: 7, sayfa: 303
Hüküm no: 632
Orijinal metin no: [55b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hani Hatun bt. Mehmed’e babasının ev hibe ettiği

Vech-i tahrîr-i hurûf budur ki Kazâ-i Yoros muzâfâtından Davudlu nâm karyeden Hanî Hâtun bt. Mehmed bu sahîfe-i hükm-i şerîf vâcibü’l-itâ‘a îrâd eyleyip mefhûm-ı münîfînde kazâ-i mezbûrdan zevcem Yeniçeri Kasım fevt olup benim üvey kızım Cihan babamındır deyu hilâf-ı şer‘-i şerîf alıp hayf eyledi bu bâbda elimde fetvâm vardır deyip fetvâsına nazar olundukda kazıyye arz eylediği gibi ise ba‘de’s-sübût şer‘le müteveccih olan hakkını hükm edip alıveriniz deyu fermân olunmağın imtisâlen li’l-emri’l-âlî karye-i mezbûreye varıp akd-i meclis oldukda mezbûre Hanî Hâtun mesfûre Cihan Hâtun üzere takrîr-i da‘vâ edip karye-i mezbûreden Davud b. Hasan tarlasıyla ve cebel ile ve çatal ağaçla mahdûd olan yeri içinde bir çatmasıyla babam hâl-i hayâtında bana verip hibe ve temlîk edip ve beni mezbûr Kasım’a tezvîc edip zikr olan evde mezbûr Kasım’la müddet-i medîd sâkin iken müşârunileyh Kasım fevt olmağın zikr olan ev babamındır deyu elimden alıp hayf eylediği şer‘le taleb ederim dedikde, mezbûre Cihan’a suâl olundukda inkâr ile cevâb vericek mezbûre hâtunun da‘vâsına mutâbık beyyine taleb olundukda udûl-i müslimînden Pîri b. Veysî ve Mustafa b. Süleyman zikr olan hudûd ile mahdûd olan yeri içinde olan çatmasıyla mezbûr Mehmed müşârunileyhâ kızına verip zikr olan çatmayı hibe ve temlîk edip mezbûre hâtun dahi cümlesin kabz ve tasarruf edip vech-i meşrûh üzere mezbûre hâtunun mülkü idiğine şâhidleriz şehâdet dahi ederiz dediklerinde şâhidânın şehâdetleri ba‘de’t-tezkiye ve’t-tahlîf hayyiz-i kabûlde vâkı‘ olup zikr olan yer ve çatma mezbûre hâtuna hükm olunup gıbbe’t-taleb kayd-ı sicil olundu. Tahrîren fî evâhiri Cemâziyelevvel li-sene ihdâ ve seb‘îne ve tis‘a-mi’e.


Şuhûdü’l-hâl: Mevlânâ Muhiddin Halîfe b. Davud ve Seyfi b. İlyas ve Davud b. Hasan ve Yeniçeri Ahmed b. Abdullah ve gayruhum