.:: İstanbul Kadı Sicilleri ::.


Üsküdar Mahkemesi 26 Numaralı Sicil (H. 970-971 / M. 1562-1563)
cilt: 7, sayfa: 303
Hüküm no: 633
Orijinal metin no: [55b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ölen Yeniçeri Kasım’ın cariyesinin, eşi Hani Hatun bt. Mehmed’e verilmesi

Vech-i tahrîr-i hurûf budur ki Kazâ-i Yoros muzâfâtından Davudlu nâm karyeden Hanî Hâtun bt. Mehmed yedinden bu sahîfe-i hükm-i şerîf vâcibü’l-kabûl vârid olan mefhûm-ı münîfînde kazâ-i mezbûrdan zevcem Yeniçeri Kasım fevt olup benim bir mülk câriyemi üvey kızım Cihan babamındır deyu hilâf-ı şer‘-i şerîf alıp hayf eyledi bu bâbda elimde fetvâm vardır deyip fetvâsına nazar edip kazıyye arz eylediği gibi ise ba‘de’s-sübût şer‘le müteveccih olan hakkını hükm edip alıveresiz deyu fermân olunmağın imtisâlen li’l-emri’l-âlî karye-i mezbûreye varıp akd-i meclis oldukda mezbûre Hanî Hâtun mezkûre Cihan Hâtun üzerine takrîr-i da‘vâ edip zevcem mezbûr Kasım evimde vefât ettikde muhallefâtını kısmet etmek diledikde Mercan nâm mülk câriyemi tasarrufumda iken babamındır deyu bilâ sübût elimden aldın şer‘le taleb ederim babanın idiğini sâbit eyle dedikde, mezbûre Cihan Hâtun’dan beyyine taleb olundukda beyyineden âciz olup zikr olan câriye-i mesfûre Hanî Hâtun’un mülkü idiğine müşârunileyhâ Hanî Hâtun’a yemîn verilip ba‘de’t-tahlîf zikr olan câriye-i mesfûre Hanî Hâtun’a hükm olunup gıbbe’t-taleb kayd-ı sicil olundu. Fi’t-târîhi’l-mezbûr İnde şuhûdü’l-mezkûrîn