Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 76 Hüküm no: 12 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. İsmail’in Manastır’ın Kukurçana köyündeki ev ve bağdaki hissesini Mustafa Beşe b. Osman’a sattığı Vilâyet-i Rumeli’de medîne-i Manastır’da Hamzabey Mahallesi ahâlîsinden iken bundan akdem vefât eden İsmail b. İsmail b. Abdullah ve li-ebeveyn er karındaşı Mehmed’e ve li-ebeveyn kız karındaşı Hadice’ye münhasıra ve tashîh-i mes’elesi dört sehmden olup sihâm-ı mezbûreden bir sehmi mezbûre Havvâ’ya ve iki sehmi mezbûr Mehmed’e ve bir sehmi mezbûre Hadice’ye isâbet ve intikāl eylediği lede’ş-şer‘ zâhir oldukdan sonra mezbûr Mehmed meclis-i şer‘-i hatîr-i lâzımü’t-tevkīrde işbu bâ‘isü’l-kitâb Mustafa Beşe b. Osman mahzarında ikrâr-ı tâm ve takrîr-i kelâm edip medîne-i merkūmeye tâbi‘ Kukurçana nâm karyede vâki‘ her birileri lede’l-ahâlî ve’l-cîrân ma‘lûmü’l-hudûd bir bâb oda ve bir ahırı müştemil mülk menzil ve kürûmu mülk bir kıt‘a bağ mûrisimiz müteveffâ-i merkūmun ile’l-vefât mülkü olup ba‘de’l-vefât benimle merkūmetâna isâbet ve intikāl etmekle sâlifü’z-zikr menzil ve bağda olan ber-mûceb-i tashîh-i mezkûr hisse-i irsiyye-i şer‘iyyemi bi-cümleti’t-tevâbi‘ ve’l-levâhık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile yüz elli guruşa merkūm Mustafa Beşe’ye bi-safkatin vâhidetin bey‘ ve temlîk her birin mahallerinde kabza taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı merkūm yüz elli guruşu mezbûr Mustafa Beşe yedinden tamamen ahz u kabzeyledim. Fîmâ ba‘d zikrolunan menzil ve bağda olan iki sehm hisse-i irsiyye-i şâyi‘am merkūm Mustafa Beşe’nin müşterâsı hakk-ı sırfı olup benim kat‘â alâka ve medhalim ve nizâ‘ım kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min-Cemâziyelâhir li-sene selâse ve erba‘în ve mi’e ve elf. Şuhûdü’l-hâl: Mehmed b. Osman, Hüseyin b. Yusuf, es-Seyyid Mustafa Efendi b. el-Hâc Mehmed imâm-ı Kara‘î, Molla Mehmed b. İsa Efendi, es-Seyyid Ali Çelebi b. Mehmed, Süleyman b. Osman, Mehmed b. Osman, Mehmed Efendi b. Abdurrahman Efendi, Molla Hasan b. Mehmed Efendi.