Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 79 Hüküm no: 14 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Satı bt. Abdullah’ın boşandığı eşi es-Seyyid Ahmed’den hamile olduğu çocuğu için nafaka tayin edildiği Nafaka-yı haml. Mahmiye-i İstanbul’da Mi‘mâr Sinan Mahallesi sâkinelerinden olup zâtı ta‘rîf-i şer‘î ile mu‘arrefe olan Satı bt. Abdullah nâm hatun meclis-i şer‘-i hatîr-i lâzımü’t-tevkīrde zevc-i mutallıkı bâ‘isü hâze’l-kitâb es-Seyyid Ahmed b. es-Seyyid Mehmed mahzarında ikrâr ve takrîr-i kelâm edip zevcim mezbûr es-Seyyid Ahmed târih-i kitâbdan bir gün mukaddem beni bâyinen tatlîk etmekle zimmetinde mütekarrir ve ma‘kūdun-aleyh bin beş yüz akçe mehr-i müeccelimi bana edâ ve teslîm ben dahi yedinden tamamen ahz u kabz eylediğimden sonra mezbûr es-Seyyid Ahmed’in firâşından nâşî hamlim olmağla vaz‘-ı haml ile iddetim münkaziye oluncaya değin nafakam için târih-i kitâbdan bi’t-terâzî kıbel-i şer‘den küll-i yevm dokuz akçe ve meûnet-i süknâm için ber-vech-i muharrer yevmî dört akçe ta‘yîn olunup meblağ-ı mezkûru harc ve sarfa ve vakt-i zarûretde istidâneye ve lede’z-zafer mezbûr es-Seyyid Ahmed üzerine rücû‘a bana izin verilmeğin meblağ-ı mezkûrdan mâ‘adâ hukūk-ı sâireye müte‘allika da‘vâdan her birimiz âharı ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 20 Safer sene [1]143. Şuhûdü’l-hâl: Mehmed Çelebi b. Abdullah, İbrahim Çelebi b. Mustafa, Duhânî Mehmed b. Ahmed, Ya‘kub b. Abdullah.