|
Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 345 Hüküm no: 757 Orijinal metin no: [68b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yeniçeri Mehmed Bey b. Abdullah’a emanet bırakılan atı, zaim Alagöz Bey b. Abdullah’ın satıp bakım bedelini ödemesi
Vech-i tahrîr-i hurûf budur ki Yeniçeri Mehmed Bey b. Abdullah meclis-i şer‘a zaîmü’l-vakt olan Alagöz Bey b. Abdullah’ı ihzâr edip bana bir kimesne günde ikişer buçuk akçeye bârgirini kavl edip Erzurumluyum deyip mahmiye-i İstanbul’a gidip yetmiş gündür zikr olan bârgirini günde ikişer buçuk akçeye besleyip ol kimesne vefât edip ol bârgiri sen kabz edip senden zikr olan akçeyi taleb ederim dedikde, gıbbe’l-inkâr mesfûr Mehmed Bey’in da‘vâsına mutâbık beyyine taleb olundukda udûl-i müslimînden Davud Bey b. Abdullah ve Mehmed b. Sadık mezbûr Mehmed Bey’in kelimâtına mutâbık şehâdet ettiklerinde şâhidân-ı mezbûrânın şehâdetleri ba‘de’t-tezkiye hayyiz-i kabûlde vâkı‘ olup meblag-ı mezbûr hükm olunup gıbbe’t-taleb kayd-ı sicil olundu. Fi’t-târîhi’l-mezbûr be-ma‘rifet-i şuhûdi’l-mesfûrîn.
|