.:: İstanbul Kadı Sicilleri ::.


Üsküdar Mahkemesi 26 Numaralı Sicil (H. 970-971 / M. 1562-1563)
cilt: 7, sayfa: 346
Hüküm no: 758
Orijinal metin no: [68b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mihal ve Kize’nin ölen Ekmekçi Kosta’nın kardeşleri olduğu

Livâ-i Mora’dan ve kazâ-yı Kalavrite’den Mihal ve Gin v. ( ) nâm zimmîler meclis-i şer‘de Üsküdar subaşısı olan Alagöz Bey mahzarında da‘vâ edip li-eb ve ümm sulb karındaşımız olan Ekmekçi Kosta bundan evvel ortağı olan Nuh Bâli’yle bir fırında işlerken mezbûr Kosta mürd olup muhallefâtın beytülmâlden mezkûr Alagöz kabz edip cümlesin satıp yirmi tane filori nakid şimdi mezbûr Alagöz Bey’in makbûzu olup hâliyâ biz verâseten taleb ederiz dediklerinde mezbûr Alagöz dahi zikr olan zimmî vech-i meşrûh üzere mürd olup bi’l-fi‘l yirmi tane filori bendedir fe emmâ mezbûr zimmîler vârisler idiğin isbât edip müstehık olsunlar deyicek sıdk-ı mekallerine beyyine taleb olundukda kazâ-i mezbûrda Müslümanlardan Ramazan b. Abdullah ve Nasrullah b. Abdullah li-ecli’ş-şehâde hâzırân olup edâ-i şehâdet-i şer‘iyye edip dediler ki biz şâhidleriz şehâdet dahi ederiz mürd-i mezkûrun mezbûrân Mihal ve Kize nâm zimmîler li-eb ve ümm sulb karındaşlardır vâris bunlardır gayrı yokdur şehâdet-i şer‘iyye eylediklerinden sonra şehâdetleri ba’de’r-ri‘âyeti’l-kabûl hayyiz-i kabûlde vâkı‘ olup istihkâklarına hükm [olup] bi’t-taleb kayd-ı sicil olundu. Tahrîren fî evâhiri Recebi’l-mürecceb sene 971.


Şuhûdü’l-hâl: Ahmed b. Hızır, Ali b. Hızır, Hamza b. Abdullah, Beşir Halîfe, Nasuh b. Hamza ve gayruhum