Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 84 Hüküm no: 21 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice ve Sâliha’nın babaları Fazlı b. Hasan b. Osman’dan kalan arsadaki hisselerini kardeşleri Halil Beşe’ye sattıkları Mübâya‘a. Mahmiye-i İstanbul’da Sultan Selim Câmi‘i şerîfi kurbünde Çukurbostan Mahallesi’nde sâkin iken bundan akdem vefât eden Fazlı b. Hasan b. Osman nâm kimesnenin verâseti kebîr oğlu Halil Beşe ve kebîre kızları Hadice ve Sâliha’ya münhasıra olup tashîh-i mes’elesi dört sehmden olup sihâm-ı mezbûrdan iki sehmi mezbûr Halil Beşe’ye ve bir sehmi mezbûretân Hadice ve Sâliha’dan her birine isâbeti tahakkukundan sonra mezbûre Hadice’nin zevci ve tarafından husûs-ı âti’z-zikri ikrâra vekîl olduğu zât-ı mezbûreyi ma‘rifet-i şer‘iyye ile ârifân olan İsmail b. Ali ve Ahmed b. Hasan şehâdetleriyle şer‘an sâbit olan Mehmed b. Musa ve merkūme Sâliha’nın vâlidesi ve tarafından vekîl olduğu zât-ı mezbûreyi ma‘rifet-i şer‘iyye ile ârifân Hasan Beşe b. Mehmed ve Mehmed b. Abdullah şehâdetleriyle şer‘an sâbite olan Selime bt. ( ) nâm hatun meclis-i şer‘-i şerîf-i enverde işbu râfi‘u’l-kitâb mezbûr Halil Beşe mahzarında biri bi’l-vekâle ikrâr ve takrîr-i kelâm edip müvekkiletân-ı mezbûretân Hadice ve Sâliha’nın babaları müteveffâ-i [mezbûr] Fazlı’dan müntakil olup mahalle-i mezbûrede vâki‘ bir tarafdan es-Seyyid el-Hâc Mustafa b. es-Seyyid Ömer mülkü ve bir tarafdan Tuğlacı Mehmed b. Hasan mülkü ve iki tarafdan tarîk-i hâs ile mahdûd muhterik arsa-yı hâliyenin tashîh-i mezbûr üzere iki sehm hisse-i irsiyyelerini tarafeynden îcâb ve kabûlü hâvî bey‘-i bâtt-ı sahîh-i şer‘î ile karındaşları mezbûr Halil Beşe’ye altı bin akçeye bey‘ ve teslîm ve temlîk ol dahi iştirâ ve temellük ve kabz ve kabûl eylediğinden sonra semeni olan meblağ-ı mezbûr altı bin akçeyi bi-kadri’l-hısas mezbûr Halil Beşe yedinden tamamen ahz u kabz edip müvekkiletân-ı mezbûretân Hadice ve Sâliha’nın kat‘â alâkaları kalmayıp Fîmâ-ba‘d arsa-yı mahdûde-i mezbûrenin mecmû‘u karındaşları merkūm Halil Beşe’nin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 Safer sene [1]143. Şuhûdü’l-hâl: İbrahim b. Mustafa, es-Seyyid Ali Çelebi, İbrahim b. Süleyman, İvaz b. Abdullah, Ya‘kub b. Abdullah, Mehmed Çelebi b. Abdullah.