Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 85 Hüküm no: 22 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostantin v. Sarafin v. Yorgi’nin Fenerkapısı dahilindeki ev ve içindeki eşyada olan hissesini Eline bt. Nikola’ya sattığı Keferenin menzil ve eşyâ mübâya‘ası. Mahmiye-i İstanbul’da Fenerkapısı dâhilinde Abdisubaşı Mahallesi sâkinlerinden olup bundan akdem hâlik olan Anastaşya bt. Kostantin v. Sarafin v. Yorgi’nin verâseti babası mezbûr Kostantin ile hîn-i helâkinde sagīr[e] hâlâ kebîre sadriye kızı Eline bt. Nikola nâm Nasrâniyeye münhasıra ve terekesinin nısfı babası mezbûr Kostantin’e ve nısf-ı âharı kızı merkūme Eline’ye isâbeti muhakkak oldukdan sonra mezbûr Kostantin tarafından husûs-ı âti’l-beyânı ikrâra vekîl olduğu Mihal v. Foti ve İstavri v. Biyo nâm zimmîler şehâdetleriyle şer‘an sâbit ve sübût-ı vekâletine hükm-i şer‘î lâhık olan Penayot v. Lefter nâm zimmî meclis-i şer‘-i hatîr-i lâzımü’t-tevkīrde zâtı mezbûreyi ma‘rifet-i şer‘iyye ile ârifân Papayaki v. Yorgi ve Dimitri v. Kostantin nâm zimmîler ta‘rîfleriyle mu‘arrefe olan bâ‘isetü’l-vesîka mezbûre Eline muvâcehesinde bi’l-vekâle ikrâr ve takrîr-i kelâm edip mahalle-i mezbûrede vâki‘ bir tarafdan Kokono nâm Nasrâniye mülkü ve bir tarafdan Kara Kosta güveyisi Polize mülkü ve bir tarafdan cidâr-ı hısn ve bir tarafdan tarîk-i âm ile mahdûd fevkānî iki bâb oda ve tahtânî bir bâb oda ve bir bi’r-i mâ ve havlu ve kenîfi müştemil mülk menzilin mecmû‘u dört sehm i‘tibârı ile iki sehm-i şâyi‘i müvekkil-i mezbûr Kostantin’in yedinde mülk ve hakkı ve iki sehm-i şâyi‘-i âharı hâlik-i mezbûrenin helâkine değin yedinde mülk ve hakkı olup ba‘de helâkihâ iki sehm-i şâyi‘-i âharı bi’l-münâsafaten müvekkil-i mezbûr ile kızı mezbûreye mevrûs olmağın müvekkil-i mezbûr Kostantin ber-vech-i muharrer menzil-i mezkûrda olan üç sehm hisse-i şâyi‘asını cemî‘ tevâbi‘ ve levâhıkı ile ve eşyâ-i memlûkesinden iki yemenî yastık ve bir yorgan ve bir minder ve bir bogası kaplı kuzu kürk ve iki gömlek ve bir mâî kapama bir zıbın ve bir çakşır ve bir ibrik ma‘a leğen iki sahan ve bir tenceresi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile merkūme Eline’ye altı yüz guruşa bey‘ ve temlîk ve teslîm eyledikde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr altı yüz guruşu müvekkil-i mezbûr merkūme Eline’nin hâl-i sıgārında kıbel-i şer‘den mansûb vasîsi olmağla anası hâlike-i mezbûrenin eşyâ ve nukūd terekesinden bi’l-irsi’ş-şer‘î merkūme Eline’nin hissesine isâbet eden altı yüz guruşuna bi’l-vesâye ba‘de’l-ahz ve’l-kabz kendi mesârifine sarfla istihlâk edip meblağ-ı mezbûr merkūme Eline’ye zimmetinde edâsı lâzım deyni olmağla deyn-i mezkûru mukābelesinde takās ve mahsûb eyledikde merkūme Eline dahi ber-vech-i mukarrer mukāssa ve kabûl eyledi. [5b] Ba‘de’l-yevm sâlifü’z-zikr menzilin mecmû‘u ve eşyâ-i muharrere-i mezkûre merkūme Eline’nin irsen ve şirâen mülk ve hakkı olup müvekkilim-i mezbûrun kat‘â alâka ve medhali kalmamışdır. Keyfemâ-teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 21 Safer sene [1]143. Şuhûdü’l-hâl: El-hâc Mustafa Efendi b. Abdullah el-imâm, Veliyüddin b. Ahmed el-müezzin, Attâr İbrahim b. el-Hâc Ahmed, el-Hâc Mustafa b. Abdullah attâr, es-Seyyid Mustafa b. el-Hâc Ahmed berber, Ebûbekir Çelebi b. ( ) berber, Derzi Hüseyin, Mehmed b. Abdullah, âciz Marko v. Yuvan, Nikolaki v. Kozi, Zefiraki v. Dimo, Ovirno v. Hristodoli.