Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 369 Hüküm no: 828 Orijinal metin no: [75b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beytullah b. Nuh Bâli’nin, Mustafa Bey b. Abdullah’a ödünçten borçlu olduğu Vech-i tahrîr-i hurûf budur ki Karye-i Aydınlı’dan Beytullah b. Nuh Bâli meclis-i şer‘a Mustafa Bey b. Abdullah muvâcehesinde bi-tav‘ihî ikrâr ve i‘tirâf edip mezbûr Mustafa Bey’den bin yedi yüz elli akçeye bir çift su sığırısın ve iki yüz nakit karz-ı hasen akçe alıp cem‘an bin dokuz yüz elli akçe deynim olup meblag-ı merkūmdan beş yüz elli akçesine Bayezid b. Mehmed’e bir öküz bey‘ edip meblag-ı mezbûru zikr olan deynim için mesfûr Mustafa Bey’e havâle edip onlar yedinden müşârunileyh Mustafa Bey’den kabûl ve kabz edip ve beş yüz akçesini dahi Kadınoğlu Ahmed’e bey‘ ettiğim öküzden havâle edip onu dahi kabûl ve kabz edip meblag-ı merkūmdan zimmetimde hâliyâ vâcibü’l-edâ dokuz [yüz] akçe deynim vardır deyu ikrâr ettikde mukırr-ı mezbûru mukarrun lehü’l-mesfûr vicâhen ve şifâhen tasdîk ve tahkīk ettikde sıhhat-ı ikrâra hükm olunup gıbbe’t-taleb kayd-ı sicil olundu. Tahrîren fî evâili Şa‘bân li-sene ihdâ ve seb‘îne ve tis‘a-mi’e. Şuhûdü’l-hâl: Abdullah Dede b. Abdulhay ve Halil b. Hamza ve diğer Halil b. Ramazan ve Hasan b. Hudâverdi ve Ahmed b. Hacı Mustafa ve gayruhum mine’l-hâzırîn