Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 377 Hüküm no: 850 Orijinal metin no: [78b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mehmed Bey b. Abdullah’ın, Yeniçeri Yunus b. Abdullah’a bir eyer sattığı Vech-i tahrîr-i hurûf budur ki Müteveffâ Mehmed Bey b. Abdullah’ın vâsisi olan Hasan b. Abdullah meclis-i şer‘a Yeniçeri Yunus b. Abdullah’ı ihzâr edip Hüseyin b. Abdullah mezbûr Mehmed Bey’in bir eyerini sana vermiş yetîm-i mezbûr için taleb ederim dedikde, mesfûr Yunus’dan suâl olundukda zikr olan eyeri müşârunileyh Mehmed Bey’e yüz altmış akçeye bey‘ edip harâca gittikde anda vefât edip merkūm Hüseyin Bey bana getirip teslîm eyledi deyicek gıbbe’l-inkâr udûl-i müslimînden Hamza b. Mehmed ve Yusuf b. Abdullah edâ-i şehâdet edip dediler ki mezbûr Yunus zikr olan eyeri mesfûr Mehmed Bey’e meblag-ı merkūma bey‘ ettiğine şâhidleriz ve şehâdet dahi ederiz dediklerinde şâhidân-ı mezbûrânın şehâdetleri ba‘de’t-tezkiye ve’t-tahlîf hayyiz-i kabûlde vâkı‘ olup mezbûr Mehmed Bey’den akçesin almadığına mezbûr Yunus’a yemîn verilip gıbbe’t-taleb kayd-ı sicil olundu. Tahrîren fî evâsıtı Şa‘bân li-sene ihdâ ve seb‘îne ve tis‘a-mi’e. Şuhûdü’l-hâl: Hacı Ahmed Çelebi b. Hasan ve Hızırcık b. Ahmed ve Mustafa Çelebi b. Şah Çelebi ve gayruhum