Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 377 Hüküm no: 851 Orijinal metin no: [78b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mehmed Bey b. Abdullah’ın haraca gittiği zaman Sinan Çelebi Efendi Vakfı’ndan aldığı borcu ödediği Vech-i tahrîr-i hurûf budur ki Müteveffâ Mehmed Bey b. Abdullah’ın yetîmine kıbel-i şer‘den vâsi olan Hasan Bey b. Abdullah meclis-i şer‘a Fatıma bt. Ali’nin vekîl-i şer‘îsi olan Ali b. Abdullah’ı ihzâr edip müteveffâ-yı mezbûrun metrûkâtında sekiz yüz sekiz akçe kabz etmiştir meblag-ı mezbûru yetîm-i mezbûr için taleb ederim dedikde, mesfûr Ali Bey’e suâl olundukda mezbûr Mehmed Bey harâca gittiği zamânda akçe lâzım olup bin akçe isteyip merhûm Sinan Çelebi Efendi mütevellîsi Mahmud b. Abdullah bin akçe Süleyman Çelebi b. Kasab Mustafa’ya verip ol dahi hâtun-ı mezbûreye teslîm edip mezbûre hâtun dahi müşârunileyh Mehmed Bey’e teslîm edip ba‘dehû vefât ettikde meblag-ı merkūm deyn-i mezbûr için mezbûre hâtuna teslîm etmiştir deyicek gıbbe’l-inkâr da‘vâsına mutâbık beyyine taleb olundukda udûl-i müslimînden Ahmed Çelebi b. Hasan ve Hızır b. Ahmed zikr olan da‘vâya mutâbık şehâdet ettiklerinde şehâdetleri ba‘de’t-tezkiye hayyiz-i kabûlde vâkı‘ olup gıbbe’t-taleb kayd-ı sicil olundu. Tahrîren fî 20 Şa‘bân li-sene ihdâ ve seb‘îne ve tis‘a-mi’e. Şuhûdü’l-hâl: Alagöz Bey b. Abdullah ve Mustafa Çelebi b. Sinan Çelebi ve Mustafa b. Mehmed ve Hüseyin Bey b. Abdullah ve gayruhum