Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 89 Hüküm no: 27 Orijinal metin no: [6a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mustafa’ya mecnun olan kocasının malından nafaka bağlanması Bâ-imzâ-i hazret-i efendi, nafaka yevm: 15 Mahmiye-i İstanbul’da Koğacıdede Mahallesi sâkinelerinden Âişe bt. Mustafa b. Mehmed nâm hatun tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iyye ile ârifân Hasan Çelebi b. Mehmed ve Mehmed b. Abdullah şehâdetleriyle sâbit olan es-Seyyid Mustafa Çelebi b. İsmail meclis-i şer‘-i şerîf-i enverde cünûn-ı mutbık ile mecnûn olan Mustafa b. Hasan’ın mutasarrıf olduğu vazîfelerini ve sâir emvâl ve eşyâsını ahz u kabz ve tesviye-i umûruna kıbel-i şer‘den mansûb vasîsi olan diğer Mustafa b. Mehmed mahzarında bi’l-vekâle takrîr-i kelâm tâ‘bir ani’l-merâm edip müvekkilem mezbûre Âişe Hatun mecnûn-ı mezbûrun zevce-i menkûhası olmağla nafaka ve kisveye eşedd-i ihtiyâc ile muhtâce olmağın kıbel-i şer‘den zevci mezbûrun mutasarrıf olduğu vazîfesinden kadr-i ma‘rûf meblağ farz ve takdîr olunmak bi’l-vekâle matlûbumdur dedikde gıbbe’t-tasdîkı’ş-şer‘î meblağ-ı âti’z-zikr mecnûn-ı mezbûrun hâline nisbetle kadr-i ma‘rûf olduğu vukūfu olan sikāt ihbârlarıyla lede’ş-şer‘i’ş-şerîf zâhir oldukdan sonra hâkim-i muvakki‘-ı sadr-ı kitâb -tûbâ-lehû ve hüsnü meâb- hazretleri dahi mecnûn-ı mezbûrun vazîfesinden olmak üzere târih-i kitâbdan [6b] yevmî on beş akçe farz ve takdîr edip meblağ-ı mefrûz-ı mezkûru kendi nafaka ve kisve ve sâir levâzım-ı zarûriyyesi’çün harc ve sarfa ve lede’l-iktizâ istidâneye ve inde’z-zafer mecnûn-ı mezbûrun vazîfesine rücû‘a müvekkile-i mezbûre Âişe Hatun’a izin verilmeğin mâ-vaka‘a bi’t-taleb ketb olundu. Fî 22 Safer sene [1]143. Şuhûdü’l-hâl: Mehmed Efendi b. ( ) Müezzinzâde, Mehmed Çelebi b. Abdullah, Mehmed Ağa b. Mahmud, Ya‘kub b. Abdullah, Abdullah b. Mustafa, İbrahim Beşe b. Mustafa.