Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 89 Hüküm no: 26 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Mustafa’nın boşandığı eşi Ayşe Hatun’un yanındaki çocuğu için nafaka ödemesi Bâ-imzâ-i hazret-i efendi, nafaka yevm: 27 Mahmiye-i İstanbul’da Camcı Ali Mahallesi sâkinelerinden olup zâtı ta‘rîf-i şer‘î ile ma‘rûfe olan râfi‘atü’l-vesîka Âişe Hatun bt. el-müvellâ el-merhûm Hamdi Ahmed Efendi meclis-i şer‘-i şerîf-i enverde zevc-i mutallıkı olup hâlâ yeniçeri ocağında beytülmâl emîni olan Ahmed Ağa b. Mustafa nâm kimesne mahzarında takrîr-i kelâm ve tâ‘bir ani’l-merâm edip işbu Ahmed Ağa zevcim olup mukaddemâ beni tatlîk etmekle mezbûr Ahmed Ağa’nın firâşından hâsıl ve benden mütevellide sagīre kızım olup bi-hakkı’l-hıdâne hacr ve terbiyemde olan işbu sagīre Zübeyde için babası mezbûr Ahmed Ağa üzerine kadr-i ma‘rûf nafaka ve kisve-bahâ farz ve takdîr olunmak matlûbumdur deyip ve mezbûr Ahmed Ağa dahi mezbûre Âişe Hatun’un kelimâtını ba‘de’t-tasdîk işbu kitâbın a‘lâsını muvakki‘-ı hâkim-i sadr-ı kitâb -tûbâ-lehû ve hüsnü meâb- efendi hazretleri sagīre-i merkūme Zübeyde’nin nafaka ve kisve-bahâ ve sâir havâyic-i zarûriyyesi’çün babası mezbûr Ahmed Ağa üzerine rızâsıyla târih-i kitâbdan külli yevmî yirmi yedişer akçe nafaka ve kisve-bahâ farz ve takdîr edip emvâl-i mefrûzayı istidâne ve sagīre-i merkūme nafaka ve kisve-bahâsına harc ve sarfa ve lede’z-zafer babası merkūm Ahmed Ağa’dan rücû‘a merkūme Âişe Hatun’a izin-birle mâ-vaka‘a bi’t-taleb ketb olundu. Fî 20 Safer sene [1]143. Şuhûdü’l-hâl: Umdetü’l-kitâb Mehmed yazıcı-i ocak, umdetü’l-müderrisîn Feyzullah Efendi Altıparmakzâde, Mehmed Çelebi kethüdâ-yı muhzırân, Eminzâde Abdullah Efendi, el-Hâc Mehmed.